Туркия Республикаси мудофаа вазирлиги вакили, полковник Тамер Зинжир матбуот анжуманида айтишича, Фатҳуллоҳ Гюлен террорчилик ташкилотига қарши кураш доирасида 17,5 минг нафар ҳарбий ишдан олинган. Бу ҳақда «Regnum» хабар берди.

«Anadolu Ajansı» хабарига кўра, полковник Тамер Зинжир қуйидагиларни маълум қилган: «Бу иш жараёнида 2016 йилнинг 16 июлидан айни пайтгача Туркия қуролли кучлари сафидан Гюлен тарафдорлари сифатида гумон қилинган 17,5 минг киши ўчирилган. Улардан 6,5 минг нафарига нисабатан жиноий ва маъмурий суд давом этмоқда. Фавқулодда вазият бартараф этилганидан бери қўлга олинган 2,5 минг нафар ҳарбийдан 226 нафарининг унвони тикланган».

Эслатиб ўтамиз, Туркияда 2016 йил 15 июлида давлат тўнтаришига ҳаракат бўлиб, оқибатда 300 нафаргача инсон ҳалок бўлганди. Туркия Қуролли Кучлари таркибига кириб олган FETÖ (Фатҳуллоҳчи террор ташкилоти) аъзолари Истанбулдаги икки асосий кўприк, халқаро аэропорт ва ички ишлар бошқармаси биносини қисқа муддатга бўлса-да эгаллаб олганди. Туркия Республикаси тарихида илк бор президент девони, ҳукумат ва парламент биноси исёнчилар томонидан бомбардимон қилинган эди.