Жаҳон матбуоти АҚШ президенти Доналд Трамп ва Tesla ҳамда SpaceX хўжайини, Ҳукумат самарадорлиги департаментининг (DOGE) собиқ раҳбари Илон Маск ўртасидаги даҳанаки тортишувни қизғин муҳокама этмоқда.

Аввал хабар берганимиздек, яқингача қил ўтмас дўст каби таассурот уйғотиб келган Трамп ва Маск сўнгги кунларда ижтимоий тармоқлар орқали бир-бирига қарши кескин айбловларни илгари сурди.

Сиёсий фанлар номзоди, таҳлилчи Иван Преображенский DW нашрида чоп этилган мақоласида Трамп ва Маск ихтилофининг Россия президенти Владимир Путинга таъсирини муҳокама қилди. 

Муаллиф фикрича, Маск тимсолида Путин Трампга кучли таъсир ўтказиб келган яқин иттифоқчидан айрилмоқда.

“Сир эмаски, Американинг янги маъмуриятида Маск Кремль намояндаларига ғоявий яқин бўлган шахслардан бири эди. Масалан, Маск Трамп ҳокимиятга келгунга қадар ҳам Владимир Путин билан мулоқот қилган. У Украинани ҳамда Зеленскийни кескин танқид қилган. Айтиш мумкинки, миллиардер Американинг янги лидерини Кремл билан ўйин ўйнашга ундаган катализаторлардан бири эди”, – деб ёзади Иван Преображенский.

Сиёсатшунос таъкидича, Оқ уйда Маскдан ташқари президентнинг махсус вакили Стив Уиткофф каби Кремлга мойил мулозимлар сақланиб қолмоқда. Аммо барибир Маск Кремль учун Трампга бевосита таъсир кўрсата оладиган шахс сифатида қадрли эди. 

Маск Путин учун Европадаги вазият бўйича ҳам яқин иттифоқчи эди, деб ҳисоблайди Преображенский.

Гап шундаки, миллиардер Европанинг турли давлатларида, жумладан, Германия, Франция ва Буюк Британияда ўта ўнг қанотга мансуб партияларни қўллаб-қувватлаб келган ва Трампни ҳам шунга ундаган. Ўта ўнг қанотга мансуб партиялар эса Путинга хайрихоҳ экани маълум.

“Бошқача айтганда, яқин вақтгача Кремль Европа Иттифоқининг алоҳида мамлакатлари ва умуман Европа Иттифоқини беқарорлаштиришда бироз бетартиб бўлса-да, бой иттифоқчига эга эди. Маск кетганидан кейин АҚШнинг Европа билан муносабатлари совуқ бўлиб қолса-да, Путин Маск учун мотам тутса арзийди. Ахир, у Кремлга (ЕИда вазиятни издан чиқариш борасида) билвосита бўлса-да, катта куч ва маблағни тежашга ёрдам бериб келаётган эди”, – деб хулоса қилади таҳлилчи Иван Преображенский.

Маск сайловолди пойгаси пайтида Трамп кампаниясининг энг йирик хайриячиларидан бири бўлганди. Орадан “қора мушук” ўтгач, Маск республикачилар вакили Трампдан буткул ҳафсаласи бир бўлганини яширмаётир. Охирги хабарларга қараганда, президент Трамп миллиардер Маск демократлар партиясини молиявий дастаклагудек бўлса, “жиддий оқибат”ларга рўбарў бўлишидан огоҳлантирган.