Аввал маълум қилинганидек, бугун АОКАда Коронавирусга қарши кураш штаби аъзоси Севара Убайдуллаева иштирокида брифинг ўтказилди.

Брифингда муҳим савол ва мурожаатлар юзасидан жавоб қайтарилди.

— Нега беморлар қолмаган вилоятлар ҳалигача қизил ҳудудга киритилгану, Тошкентда касалланганлар сони кўплигига қарамай, сариқ ҳудуд деб эълон қилинган?

— Касалланиш бўйича статистика ҳар куни ўзгариб туради.

Ҳудудда ўтказилган полимераза-занжир реакцияли таҳлиллар сони, янги аниқланган касаллик ва тузалган беморлар сони ўзгаришига қараб ҳудудлар «ранги» ўзгариши мумкин.

— Тошкент шаҳрида касаллик аниқланиши ортса шаҳар «қизил ҳудуд»га айланиши мумкинми?

— Ҳа, агар карантин чоралари юмшатилганини тўғри тушунмасдан, бепарволикка йўл қўйилса ва шу ҳудудда касалланиш кўпайса «қизил ҳудуд»га ўтказилиб, карантин чоралари кучайтирилади.

— Вирус аниқланган «Ипотека банк» ходими касалликни қаерда юқтирган?

— Бу борада эпидемиологик суриштирувлар олиб борилмоқда. У билан мулоқотда бўлган барча фуқаролар қоидага кўра 14 кунлик карантинга олинган.

— Фаолиятини тиклаган корхона ва ташкилотлар янги санитария норма ва қоидаларига кўра СЭС билан шартнома тузиши мажбурийми? Дезинфекция ишларини мустақил амалга оширса бўлмайдими?

— Дезинфекциянинг бир неча турлари мавжуд. Ҳар қандай бино тўлиқ эпидемиологик осойишталик хизмати ходимлари томонидан дезинфекция қилинади.

Узоқ вақт танаффус қилган корхона ва ташкилот биноси СЭС ходимлари томонидан дезинфекцияланиши мақсадга мувофиқ.