Франция президенти Эммануэль Макроннинг мамлакат жануби-шарқига сафари чоғи кўнгилсизлик рўй берди. Тен Л'Эрмитаж коммунасида аҳоли билан учрашув пайти кутилмаганда панжара ортидаги эркак «Макронизм даф бўлсин!» дея ҳайқириб, давлат раҳбарига тарсаки тортиб юборди. Ушбу ҳолат акс этган видео интернет тармоғида яшин тезлигида тарқалди. Жумладан, «Xabar.uz» ҳам уни эълон қилди.

Албатта, Франция президенти хавфсизлик хизмати ходимлари дарҳол бояги шахсни қўлга олишди. Аммо ғишт аллақачон қолипдан кўчган, давлат раҳбари ноқулай вазиятда қолган эди. Сиёсий етакчиларнинг тансоқчилари ҳар қанча ҳушёр, ҳар қанча сергак бўлмасин, бу каби фавқулодда ҳолатлар рўй бериб туради. Қуйида президентлар билан боғлиқ айрим кўнгилсиз ҳолатларни ёдга олиб ўтамиз.

Сўз аввалида айтиш керакки, Эммануэль Макрон сиёсий карьераси мобайнида омма норозилигига бир неча марта рўбарў келган. 2017 йили ҳали президентликка номзод бўлган кезлари Парижда қишлоқ хўжалиги кўргазмасида қатнашаётган Макронга тухум отишган. «Айрим масалалар бўйича хилма-хил фикр айтсангиз, тухум улоқтиришга тушишади... Бу Франция сиёсий ҳаётининг таркибий қисми, ҳамиша шундай бўлган», – деган у ўша кўнгилсизликни изоҳлар экан. Дарвоқе, Макрон 2016 йили иқтисодиёт вазири лавозимида фаолият юритган вақтда ҳам пойтахт яқинидаги шаҳарчада «тухумбўрон» қилинган.

АҚШ президенти Жорж Буш (2001-2009) 2008 йил декабрь ойида Ироққа қилган сафарини бир умр унутмаслиги аниқ. Чунки ўшанда нафақат Буш, балки дунё жамоатчилиги ёдида қолган жанжалли воқеа рўй берган. Бағдодда ташкил этилган матбуот анжуманида маҳаллий журналист Мунтазар аз-Зайдий Ироқдаги уруш ва хунрезликларга норозилик ифодаси сифатида Оқ уй соҳибига ўз оёқ кийимини улоқтирган. Мунтазар аз-Зайдий ҳуқуқбузарлик сабаб муайян муддатга қамалган, албатта, аммо аксар ироқликлар уни қаҳрамон ўлароқ қабул қилган.

Турли йилларда тўрт марта Италия ҳукуматини бошқарган сиёсатчи ҳамда ишбилармон Сильвио Берлускони 2009 йилнинг декабрида фавқулодда ҳодиса сабаб жиддий жароҳатланган. Милан шаҳрида ташкил этилган митинг пайти 42 ёшли Массимо Тарталья исмли шахс бош вазирга қарата оғиргина статуэткани отган. Оқибатда Берлусконининг бурни жароҳатланган, иккита тиши синиб тушган. Кейинроқ безори руҳий хасталар рўйхатида туриши маълум бўлган.

Франция президенти Николя Саркози (2007-2012) ҳам 2011 йилда шундай ҳолатга дуч келган. Елисей саройи соҳиби кўп сонли аҳоли билан учрашувга келган пайтда Эрман Фюсте исмли шахс унинг пиджаги ёқасига ёпишган. Кейинроқ маълум бўлишича, Э.Фюсте Франциянинг Ливияда ҳарбий операциялар олиб бораётганига норозилик ифодаси ўлароқ шундай йўл тутган. Президентнинг ёқасидан олган шахс ярим йил шартли қамоққа ҳукм қилинган.

Германия президенти Кристиан Вульфнинг (2010-2012) 2011 йил апрель ойида мамлакат бўйлаб сафари чоғи ҳам кўнгилсизлик рўй берган. 48 ёшли шахс президент ва унинг ёнидаги Ҳессен федерал ери бош вазирини «тухумбўрон» билан сийлаган. «Президентнинг кийими расво бўлди, аммо унинг ўзи тетик кайфиятда», дея баёнот берган эди давлат раҳбари маъмурияти ўшанда. Қарангки, ушбу дилхираликдан кўп ўтмай президент Вульфга қарши ғазна пулини талон-торож қилиш айби илгари сурилди. Пировардида у истеъфо беришга мажбур бўлди.

Чехия президенти Вацлав Клаус (2003-2013) эса бундай ҳам қўрқинчлироқ ҳолатга дуч келган. 2012 йили Храстав шаҳридаги янги кўприкнинг очилиш маросимида 26 ёшли йигит қўлбола тўппончадан сиёсатчига қарата ўт ўзган. Албатта, пластик ўқдан президент жиддий жароҳатланмаган, аммо бу ҳол чех жамиятида анчагина муҳокамаларга сабаб бўлгани бор гап. 

Ботсвана президенти Ян Кхама (2008-2018) эса оддий безори эмас, балки нақ йиртқич ҳужумига нишон бўлган. 2013 йил ҳарбий базага ташриф пайти давлат раҳбари қафасдаги гепардни томоша қилаётган пайтда дарранда кутилмаганда унга ҳамла қилган ва юзига жароҳат етказган. Президент бир муддат юзидаги жароҳатни яшириш учун гримчи хизматидан фойдаланишига тўғри келган.

Украина президенти Пётр Порошенко (2014-2019) мухолифлари томонидан ўзига хос тарзда сазойи қилинган. 2019 йили Киев шаҳрида ташкил этилган оммавий тадбирда маъруза қилган Порошенкога номаълум шахс тухум улоқтирган. «Тухумбўрон»дан сиёсатчининг рафиқаси ҳам азият чеккан.

Оломоннинг ғазабидан Қирғизистон президенти Сооронбай Жээнбеков (2017-2020) ҳам бенасиб қолмаган. 2020 йил Ўш шаҳридаги марказий майдонда нутқ ирод қилаётган Жээнбековга издиҳом дастлаб ҳуштакбозлик билан эътироз билдирган. Кейин эса беш-ўн чоғли одам саҳнага чиқиб турта-турта давлат раҳбаридан микрофонни тортиб олган.