Президент Шавкат Мирзиёев атроф муҳитни муҳофаза қилишга қаратилан видеоселектор давомида Тошкент шаҳри, вилоятлар марказлари ва йирик шаҳарларда дарахтлар пала-партиш экилаётганини танқид қилди. Оқибатда экилган кўчатлар қуриб бораяпти. Бу ҳақда «Xabar.uz» мухбири маълум қилди.

— Тошкент шаҳри туманлари, вилоят марказлари ва йирик шаҳарларда дарахтлар ва экинлар маҳаллий иқлимни инобатга олмасдан, пала-партиш экилаётгани боис, кундан-кунга қуриб бораяпти.

Туман ҳокимлари ободонлаштириш ва кўкаламзорлаштириш ишларини ўз ҳолига ташлаб қўйган, шаҳар кўчалари чиқиндига тўлиб кетгани билан ҳеч кимнинг иши йўқ.

Қани туман ҳокими, қани сектор раҳбари? — дея савол қўйди давлат раҳбари.

Президент ҳокимлардан бир ой муддатда Қашқадарё ва Самарқанд тажрибаларини барча ҳудудларда жорий этишни талаб қилди. Бунинг учун нима қилиш кераклигини ҳам кўрсатиб ўтди.

— Ҳар бир маҳаллага дарахтларни парваришлаш учун, Жамоат ишлари жамғармаси ҳисобидан 1 нафардан ишчи бириктирилади. Вилоят ҳокимлари ушбу тизимни амалиётга жорий қилишга масъул бўлади.

Шунингдек, туман ва шаҳар ободонлаштириш бўлимларига ажратилаётган 10 мингта штат доирасида ҳар бир туман (шаҳар) ҳудудидан келиб чиқиб, 5 та ишчидан иборат дарахтлар сақлаш бўйича гуруҳлар ташкил этилади.

Ушбу гуруҳлар ҳудудлардаги дарахтларнинг хатлови, парвариш қилиниши ва сақланиши билан шуғулланади, — деди Шавкат Мирзиёев.

Йиғилиш давомида вилоят ҳокимларига Ш.Назаров (Автойўл) билан биргаликда 1,3 минг километр магистрал йўллар бўйларига, ҳудудларнинг иқлимидан келиб чиқиб, сентябрь-декабрь ойларида 480 минг дона кўчат экиш топшириғи берилди. Шунингдек, келгуси йил баҳор ойларида 330 минг дона чинор, эман, жийда, терак ва бошқа дарахт кўчатлари экишни таъминлаш талаб қилинди.