2022 йилнинг сентябр ойидан Ўзбекистонда саёҳат қилувчилар учун кешбек олиш тизими йўлга қўйилгани ҳақида хабар берилган эди. Унга кўра, сайёҳлар «Ўзбекистон бўйлаб саёҳат қил!» дастури доирасида ишга туширилган «Саёҳат учун кешбек» платформаси орқали республика бўйлаб саёҳат қилиб, сарфлаган харажатларининг бир қисмини қайтариб олиш имконига эга бўлишади!

Кешбек олиш тартиби қандай?

Бунинг учун Сиз қуйидагича йўл тутишингиз керак:

1-қадам. Apple App Store ёки Google Play market платформаларидан Soliq.uz мобил иловасини юклаб оласиз;

2-қадам. Мобил илова хизматидан фойдаланиш учун тизимда шахсингизни тасдиқлайсиз ёки суратдаги каби исм-фамилиянгиз ва телефон рақамингизни ёзиб, рақамингизга келган кодни киритасиз;

3-қадам. Иловадан «Саёҳат учун кешбек» хизматини топасиз;

4-қадам. Саёҳат йўналишини ва саналарини танлайсиз (ўзингиз борадиган жой ва санани белгилайсиз);

5-қадам. Кешбекларни йиғиш учун фискал чекларни сканерлаш орқали авиа, темир йўл ёки автобус чипталарини иловага киритасиз;

6-қадам. Саёҳат давомида ўзингиз жойлашган жойлашув маскани тарафидан тақдим қилинган QR кодли чекни сканерлаш орқали иловага киритасиз;

7-қадам. Саёҳат давомида камида 1 дона маданият масканига ташриф буюриб, маданият маскани тарафидан тақдим қилинган QR кодли чекни сканерлаш орқали иловага киритасиз;

8-қадам. Мароқли саёҳатдан сўнг «Саёҳатни тугатиш» тугмасини босасиз ва йиғилган кешбек суммаларини шахсий маҳаллий банк пластик картасига ўтказасиз.

Унутманг! Кешбек тизими Давлат солиқ қўмитасининг махсус мобил иловаси (Soliq.uz) платформаси имкониятлари асосида ташкиллаштирилган бўлиб, харажатлар ҳаққонийлиги мобил илова ёрдамида текширилиб, харид чекининг матрицали штрих кодини (QR -код) кўрсатиш орқали саёҳатлар рўйхатдан ўтказилади.

Қайси харажатларга кешбек берилади?

Саёҳат харажатларини қайтариш саёҳат қилиш давомида бир вақтнинг ўзида қуйидагилар назарда тутилган ҳолда амалга оширилади:

– Авиа, темирйўл ва автобусдан фойдаланиш;

– Жойлаштириш воситалари хизматларидан фойдаланиш;

– Маданият ташкилотларига ташриф буюриш.

Кешбек миқдори қанча?

– Авиақатнов орқали бориб-келиш чиптаси нархининг 15 фоизи, лекин 150 минг сўмдан ошмаган миқдорда;

– Темирйўлда ёки автобусда бориб-келиш чиптаси нархининг 15 фоизи, лекин 80 минг сўмдан ошмаган миқдорда;

– Жойлаштириш воситасида тунаб қолиш харажатининг 15 фоизи, лекин 80 минг сўмдан ошмаган миқдорда;

– Театр, музей, цирк ва бадиий галереяларга ҳар бир ташриф чиптаси нархининг 50 фоизи, лекин 20 минг сўмдан ошмаган миқдорда.

Эслатиб ўтамиз: «Саёҳат учун кешбек» платформаси сентябр ойидан ишга тушди.