Қозоғистонда ҳукмрон «Аманат» партияси амалдаги президент Қосим-Жўмарт Тўқаевни бўлажак сайловда президентликка номзод сифатида кўрсатди.

«Аманат»нинг навбатдан ташқари XXIV қурултойида партия раиси Ерлан Кошанов шундай деди:

«Бир овоздан қарор қилинди. Ҳурматли шу партия аъзолари, Аманат партиясининг XXIV қурултойи қарори билан Қосим-Жўмарт Кемелевич Тўқаев бир овоздан Қозоғистон Республикаси Президентлигига номзод сифатида кўрсатилди».

Қурултой иштирокчилари Тўқаев номзодини бир овоздан қўллаб-қувватлашди.

Жорий йилнинг 1 сентябрь куни Тўқаев муддатидан олдин сайлов ўтказилишини билдирган эди. Қозоғистонда навбатдаги президентлик сайлови 20 ноябрда ўтказилади. Тўқаев имзолаган конституцияга ўзгартишларда жорий йилдан бошлаб президент фақат бир марта 7 йиллик муддатга сайланиши қайд этилган.

Айни пайтда президентликка бошқа партиялар ҳам ўз номзодларини олға сурмоқда. «Ауил» партиясидан Жигули Дайрабаев, ОСДПдан Нурлан Ауесбаев, «Аманат» касаба уюшмаларидан Мейрам Кажикен номзодлари кўрсатилган.