22 апрель куни ФВВ навбатчилик бўлинмасига Республика шошилинч тез тиббий ёрдам илмий марказининг Қашқадарё филиалидан трактор ағдарилиши натижасида жароҳат олган фуқарога ёрдам кўрсатиш зарурлиги тўғрисида мурожаат йўлланган. 

Маълум бўлишича, Қашқадарё вилоятининг Деҳқонобод туманида фуқаро Б.М далада ишларини бажараётган вақтида, кучли ёмғир ёғиши ва хавфсизлик қоидаларига риоя қилмаслиги туфайли трактори ағдарилиб кетган. 

Натижада Б.М. оғир ярадор ҳолда «Оққишлок» врачлик пунктида олиб кетилган. Жабрдийда  Республика шошилинч тиббий ёрдам илмий марказининг Қашқадарё филиалига етказилиши керак бўлган, бироқ об-ҳавонинг ёмонлиги, йўллардаги муаммолар, шунингдек, қишлоқ ва туман маркази ўртасидаги масофа туфайли беморга шошилинч ёрдам кўрсатиш имкони бўлмаган.

Қашқадарё вилоятининг Фавқулодда вазиятлар бошқармаси, МИ-171 вертолётида Б.М. қутқарувчилар назорати остида Қарши шаҳрининг Хонобод аэродромига олиб борилган. У ердан Республика шошилинч тиббий ёрдам илмий марказининг Қашқадарё филиалига жўнатилган. Ҳозирги вақтда беморга зарур тиббий ёрдам кўрсатилмоқда.