Ўтган йилнинг 27 декабрида Қамчиқ довони орқали ўтувчи А-373 «Ташкент-Ўш» автомобили йўли кучли қор бўрони туфайли маълум муддат ёпилган эди. Фавқулодда вазиятлар вазирлиги (ФВВ) 11-14 январ кунлари ҳам бу довонда кучли қор ёғиши кутилаётгани ҳақида хабар қилди.

Бу хабар ортидан кўпчиликни қизиқтирган саволлар билан ФВВ матбуот хизмати ходими Рустам Мирзатаевга мурожаат қилдик.

- Рустам ака, яқин кунларда кучли қор ёғиши натижасида Қамчиқ довонида транспорт ҳаракати тўхтатиладими?

-Буни олдиндан айтиб бўлмайди. Ҳаммаси вазиятга кўра маълум бўлади.

- Шу ўринда савол туғилади - Қамчиқ довонида ҳаракатланиш маълум муддат тўхтатилишини ким ёки қайси давлат идораси белгилайди? Фавқулодда вазиятлар вазирлигими?

- Довон орқали ўтувчи А-373 автомобил йўли стратегик аҳамиятга эга. Об-ҳаво ўзгариши ёки бошқа сабабларга кўра транспорт ҳаракати вақтинча тўхтатилиши битта вазирлик томонидан амалга оширилмайди. Агар юзага келган вазият йўловчилар ҳаёти учун реал хавф туғдирса, ФВВ ҳузуридаги гидрометеорология хизмати маркази томонидан мураккаб об-ҳаво шароитлари (қор бўрони, қалин туман, қор уюмлари, изғирин, сел ва ҳ.к.) тўғрисида хабар олинганда автомобил йўлининг “Қамчиқ” довонидан ўтган қисмида транспорт воситалари ҳаракатини вақтинча чегаралаш ва вазиятни ҳисобга олиб, ҳаракатни тиклаш тўғрисида Фавқулодда вазиятлар вазирлиги, Ички ишлар вазирлиги, “Ўзавтойўл” компанияси масъул ходимларидан тузилган Тезкор штаб томонидан қарор қабул қилинади ҳамда бу ҳақда Вазирлар Маҳкамасига ахборот юборилади.

Мазкур қарорни бажариш, яъни довонда автотранспорт воситалари ҳаракатини вақтинча тўхтатиш ҳамда вазиятни ҳисобга олиб ҳаракатни тиклаш ИИВ ЙҲХБ га юклатилган.

Қайта таъкидлайман – бундай қарорга фақат фуқаролар саломатлиги ва ҳаётига хавф солувчи вазият бўлсагина келинади. Шунинг учун йўловчиларимиздан бундай вазиятда сабр қилишларини, ҳаммаси айнан уларнинг хавфсизлиги учун қилинаётганини англаб етишларини сўрардим.