Ўзбекистонда яна самолётлар ишлаб чиқариш бошланади. Бу ҳақда Sputnik Ўзбекистон мухбирига “Навоий” ЭИЗ директори Хабиб Абдуллаев маълум қилди.

Тошкентда бўлиб ўтган ИННОПРОМ кўргазмасида “Навоий” эркин иқтисодий зонаси дирекцияси” АЖ ва Россиянинг "Первое" тажриба-конструкторлик бюроси МЧЖ ўртасида меморандум имзоланди.

Ҳужжатда СП-30 лойиҳаси асосида фуқаролик типидаги бошқариладиган ва учувчисиз самолётларни ишлаб чиқаришни жойлаштириш назарда тутилган. Айтилишича, октябрь ойидан бошлаб йилига 100 та самолёт ишлаб чиқариш бошланади.

“Лойиҳанинг умумий қиймати учинчи йилда 100 та машина ишлаб чиқариш режаларидан келиб чиқиб, 3 йил давомида 30 миллион долларга баҳоланмоқда. Биринчи самолёт 2025 йил октябрь ойида чиқарилиши режалаштирилган”, — деди Sputnik Ўзбекистон мухбирига “Навоий” ЭИЗ директори Хабиб Абдуллаев.

Қайд этилишича, ўзининг енгил самолётлар ва самолёт типидаги учувчисиз учиш аппаратларини яратиш Ўзбекистонга ўзининг авиация саноатига эга давлатлар қаторига қайтиш имконини беради.

Ишлаб чиқариш Ўзбекистоннинг ички эҳтиёжларини қондиришга, шунингдек, Яқин Шарқ, Марказий ва Жанубий Осиё мамлакатларига экспорт қилишга йўналтирилган.

Маълумот учун, СП-30 бутунлай металлдан ясалган, икки ўриндиқли самолёт бўлиб, у аллақачон Россияда энг кўп ишлаб чиқарилган енгил самолётга айланди.