ЖЧ-2026 ҳал қилувчи саралаш босқич 6-турида Ўзбекистон терма жамоаси Лаосда Шимолий Корея меҳмони бўлди.

Элдор Шомуродов ва Отабек Шукуров жароҳат сабаб майдонга тушмади.

Биринчи таймда рақибдан бироз устунликка эришган вакилларимиз Аббосбек Файзуллаевнинг голи эвазига олдинга чиқиб олди — 1:0.

Иккинчи бўлимда футболчиларимиз негадир «иккинчи рақам» остида ҳаракат қилишди. Оқибатда ўйин жилови ва майдондаги устунлик тўлиқ корейслар назоратига ўтди. Жуда оғир жазоланишимиз ҳам мумкин эди. Фақат омад ва дарвозабонимиз бизни асраб қолди. 83-дақиқада бош ҳакам Умарбек Эшмуродовнинг қўполлигини ВАР орқали текшириб, уни майдондан четлатди. 10 киши қолган жамоамиз дарвозаси томон пеналти белгиланди. Жамоамиз бахтига бу сафар ҳам дарвозабон Ўткир Юсупов 11 метрлик жарима зарбасини қайтара олди. У 1-даврада Тошкентда ўтган баҳсда ҳам корейсларнинг пеналтидан йўллаган зарбасини бартараф эта олганди. Юсупов кейинроқ рақибнинг яна бир хавфли зарбасини қайтарди.

Ўзбекистон энг ёмон ўйинларидан бирида энг муҳим очколарни шу тариқа қўлга киритиб, гуруҳда 13 очко билан 2-ўринда бормоқда. Гуруҳ етакчиси Эрон бугун Қирғизистон меҳмони бўлади, БАА ва Қатар эса ўзаро курашади. Ўзбекистон навбатдаги турни кейинги йилнинг март ойида Тошкентда Қирғизистонга қарши ўтказади.

ЖЧ-2026 саралаши.

А гуруҳи. 6-тур

КХДР – Ўзбекистон – 0:1

Гол: Аббос Файзуллаев, 44

КХДР: 1.Канг Жу Хёк, 3.Жанг Кук Чол, 4.Ким Пом Хёк, 9.Ри Жо Гук (11.Жон Ил Гван, 70), 10.Хан Кванг Сонг, 13.Ри Ил Сонг, 14.Чоэ Ок Чол, 15.Ри Ун Чол, 16.Ким Ю Сонг, 17.Канг Кук Чол, 20.Паэк Чунг Сонг (22.Пак Кванг Хун, 70)

Ўзбекистон: 1.Ўткир Юсупов, 2.Абдуқодир Ҳусанов, 3.Ҳожиакбар Алижонов, 6.Акмал Мозговой, 9.Одил Ҳамробеков, 13.Шерзод Насруллаев, 10.Жалолиддин Машарипов (11.Азизбек Амонов, 80), 15.Умарбек Эшмуродов, 17.Бобур Абдухолиқов (20.Ҳожимат Эркинов, 64), 22.Аббосбек Фазуллаев (19.Азизбек Турғунбоев, 79), 23.Ҳусниддин Алиқулов.

Четлатиш: Умарбек Эшмуродов, 83.