Бугун, 2 февраль куни Миллий олимпия қўмитасида Ўзбекистон бокс федерациясининг навбатдан ташқари ҳисобот-сайлов Конференцияси бўлиб ўтди, деб хабар берди қўмита матбуот хизмати.

Ҳисобот-сайлов Конференцияси кун тартибидан ўрин олган энг асосий масала Ўзбекистон бокс федерацияси раисининг биринчи ўринбосарини сайлашдан иборат эди.

Конференцияда ушбу масъулиятли лавозимга Сакен Жетибаевич Полатов номзоди илгари сурилди.

С.Полатов 1975 йилда Тошкент шаҳрида таваллуд топган. Маълумоти олий. «Orient Finans Bank» бошқарув кенгаши раиси. Бир неча йилдан буён спорт соҳасида, жумладан Тошкентнинг «Локомотив» футбол клуби тизимида фаолият олиб боради.

Мазкур номзод Конференция иштирокчилари томонидан бир овоздан қўллаб-қувватланган. Шу тариқа, Сакен Полатов Ўзбекистон бокс федерацияси раисининг биринчи ўринбосари лавозимига сайланди.

МОҚ президенти Умид Аҳмаджоновнинг билдиришича, бунгача ушбу лавозимда узоқ йиллардан буён фаолият олиб борган Шерзод Тошматов соғлиғи билан боғлиқ муаммолар сабаб ўз аризасига кўра лавозимини топширган.