Қозоғистон президенти Нурсултон Назарбоев Наврўз айёми муносабати билан Ўзбекистон халқига байрам табриги йўллади. Видео Шавкат Мирзиёевнинг «Facebook» ҳамда «Telegram»даги саҳифаларида эълон қилинди.

Эслатиб ўтамиз, аввалроқ Нурсултон Назарбоев Шавкат Мирзиёев таклифига кўра 2018 йилнинг 21 март куни Ўзбекистонга ташриф буюриши, икки қардош давлат президентлари Наврўз байрамини қадимий шаҳарда нишонлаши кутилаётгани ҳақида хабар берган эдик.

Олий мартабали меҳмон бугун, Самарқандда Президент Шавкат Мирзиёев томонидан юксак ҳурмат-эҳтиром билан кутиб олинди. Самарқанд шаҳридаги Форумлар мажмуасида икки давлат раҳбарларининг учрашуви бўлди.

Шундан сўнг президентлар Ҳазрати Хизр мажмуасига ташриф буюриб, мустақиллигимиз асосчиси Ислом Каримов қабрини зиёрат қилишди. Қозоғистон Президенти давлатимиз раҳбари ҳамроҳлигида Самарқанднинг диққатга сазовор жойларини томоша қилди.

Шу билан Қозоғистон Республикаси Президенти Нурсултон Назарбоевнинг мамлакатимизга ташрифи ниҳоясига етди.