«Манчестер Юнайтед» жамоасини вақтинча бошқариб турган Майкл Кэррик бугун клубда қолмаслиги бўйича кутилмаган баёнот берди. Бу ҳақда жамоа матбуот хизмати маълум қилди.

Оле-Гуннар Сулшер жамоадан кетгач, ўрнига вақтинчалик Майкл Кэррик мураббий этиб тайинланганди. Кэррик билан 3 та ўйин ўтказган «Манчестер Юнайтед» ҳозирча бирор марта ҳам ютқазмади.

ЕЧЛ гуруҳ босқичи 5-тури доирасида Испанияга сафар қилган манкунианликлар «Вилярреал»ни ишончли тарзда (2:0) енгган бўлса, АПЛнинг 2 турида ҳам муҳим очколарни қўлга киритишди. Жумладан, сафарда «Челси» билан дуранг ўйнаган бўлса, кеча ўз уйида «Арсенал»ни мағлуб этди (3:2).

«Узоқ ўйлаб шу қарорга келдим, ҳозир жамоани тарк этиш учун энг қулай вақт. Барча ўйинчилар, ходимларга расман ўз миннатдорлигимни билдираман. Бундай ажойиб инсонлар билан ишлаш ҳақиқий ҳузур бағишлайди. Мен «Манчестер Юнайтед»нинг мухлиси бўлганман ва шундай қоламан, иложи борича кўпроқ ўйинларга тушишга ҳаракат қиламан», деди Кэррик.

«Манчестер Юнайтед» жамоасини мавсум охиригача Ралф Рангник бош мураббий сифатида бошқариб туради. У декабр ўрталарида жамоага қўшилиши кутиляпти.