Янги Зеландияда коронавирусга чалинган охирги бемор тузалиб чиққани ҳақида 9 июнда хабар бергандик. Аммо коронавируснинг сўнггиси бўлмайди, шекилли... Куни кечаги баёнотида ушбу мамлакат бош вазири Жасинда Ардерн 19 сентябрга белгиланган парламент сайловлари 17 октябрга кўчирилишини маълум қилди. Сабаби — коронавирус. Бу ҳақда «The New Zealand Herald» хабар берган.

Бош вазир ушбу қарор мамлакат сиёсатчилари билан бамаслаҳат қабул қилинганини айтди. 

Мамлакатда охирги дам олиш кунлари 29 кишида коронавирус аниқланди. Касалликнинг фаол шакли билан оғирганлар сони 78 нафарга етди. Булардан 58 нафари касалликни мамлакат ичкарисида юқтирган, қолган 20 киши эса четдан олиб келган. Беш нафар бемор шифохонага ётқизилган, 86 киши эса ташхиси чиққунига қадар карантинга олинган.

Янги Зеландияда биринчи ковид-бемор 28 февраль куни рўйхатга олинганди. Пандемия даврида мамлакат бўйича 1532 киши касалликдан фориғ бўлди, 22 киши эса касаллик қурбонига айланди.

11 август куни, 102 кунлик танаффусдан сўнг, Янги Зеландияда тўрт кишида коронавирус топилганидан сўнг мамлакат бўйлаб санитария-эпидемия чекловлари яна тиклана бошлади.

Хусусан, оралиқ масофани сақлаш, бегоналар билан мулоқот қилмаслик, оммавий тадбирлар қатнашчилари сони 100 кишидан ортиб кетмаслиги каби чекловлар.

Тўрт бемор аниқланган Оклендда эса қоидалар янада қаттиқ: одамларга уйларида қолиш уқтирилмоқда, кўча ва жамоат жойларида имкон қадар ниқобни ечмаслик шарт. Корхоналар, муассаса ва идоралар буткул ёпилган, таълим масканлари тўлиқ онлайнга ўтказилган. Бир жойда 10 дан ортиқ одам тўпланиши мумкин эмас. Шаҳарга кириш-чиқишни полиция қаттиқ назоратга олган.