Нимадандир безовтамисан?

Катта футболни соғиндингми?

Кел, яхшиси сенга «Ливерпуль»даги саккиз йилинг ҳақида айтиб бераман, жим эшит...

Мен 12 яшар бола эдим, кечки пайт телевизорни ёқдим. Тасодифни қара, ўшанда сени «Сигнал Идуна Парк»даги сўнгги ўйининг экан. Трибуналар портретингга тўлган эди. Ростанам Дортмундда ажойиб ишлар қилдинг, шу сабаб сенга меҳрим бўлакча эди.

Тасодифнинг каттаси ўша йилнинг кузида рўй берди – сен «Ливерпуль»га мураббий этиб тайинландинг. «Қизиллар» ўша пайтларда «йўқчиликдан боши эгилган кишидек» бўлиб қолганди. Жамоа 2010 йиллар бошидан бери паст-баланд натижаларга эришиб, йилдан-йил ортга қадам ташлаб борарди. Сен ўша қора кунларни аритишинг керак эди.

Жамоадаги биринчи мавсуминг ҳам ёмон бўлмади: АПЛда саккизинчи ўрин ва Европа лигаси финали. Мавсумни ярмига яқин келганинг ва таркибдан келиб чиқиб, бу натижани тўғри қабул қилдим. Европа лигаси финалида турнир «эгаси»га тушиб қолмаганингда илк совринни ўшандаёқ қўлга киритардинг. Майли, ҳали у совринни жамоанг ҳам, мухлисларинг ҳам менсимай қўяди. Қандай қилиб дедингми? Жим, мени эшит дедимку сенга!

«Ливерпуль»га келган дастлабки икки йилингда ўйинларингни трансляция билан бўлган муаммолар сабабли тўлиқ кўра олмадим. Лекин иккинчи мавсумингдаги ўйинларинг билан «Ливерпуль»га кўп нарса бера олишинга ишондим. Премьер лигада 4-ўринни олиб, мухлислар соғиниб қолган ЕЧЛ йўлланмасини туҳфа қилдинг. Қолаверса, ўша мавсумда жамоангда Садио Мане деган ўйинчи пайдо бўлди ва илк кашфиётингга айланди. Айни ўша йиллари «Реал», «Атлетико», «Бавария», «Ювентус» ва «Барса» Европа футболи чўққисида туришарди.

Эсимда, акам қайси жамоага мухлислик қилишимни сўраганида «Ливерпуль» дедим. Устимдан кулди. «Барса» ва «Реал» «Ливерпул»ингни ямламай ютади деганди. Ҳа, ўша пайтда четдан шунақа кўрингандир, лекин мен шонли «Ливерпуль»ни қайтаришингга ишонардим. 2017 йилнинг ёзида Моуринио менсимай «Челси»дан ҳайдаган Салаҳни олиб келдинг. Шундай қилиб, янги мавсумни Коутинио, Фирмино, Мане ва Салаҳ тўртлиги билан бошладинг, аммо ҳужум қанча кучли бўлмасин дарвоза ва ҳимоя заифлигидан кўп панд единг. Охири мавсум ўртасида жамоа лидери Коутиниони сотишга мажбур бўлдинг, лекин ҳаммаси шундан кейин бошланди.

Қишнинг ўзида Виржил Ван Дейк жамоага келди, асосий дарвозабон Миньоле ўрнига Кариус тура бошлади. Клайн ва Моренога ўринбосар сифатида кўрилган Арнолд ва Робертсон силлиққина асосий таркибга кириб олди ва ҳимоядаги муаммолар бартараф этилди. Ҳужумда эса Фирмино, Мане ва Салаҳ учлиги голларни қалаштириб ташлади. Мавсум аввалида ЕЧЛ гуруҳ босқичидан чиқишингга кўпчилик шубҳа билан қараганди, сен эса тортинмай финалгача бординг. Кариуснинг «қовунлари» ва Рамоснинг «қинғир» иши бўлмаганида эҳтимол, ЕЧЛга қайтганингни мусобақа кубоги билан  нишонлардинг. Ўшанда жуда сиқилгандим, 12 йил деганда финалга чиқиб ютқаздинг энди яна қачон чиқаркансан, деб.

2018-19 йил мавсумидаги «Ливерпуль» негадир энг кучли бўлиб кўзимга кўринади. Тўғри АПЛни яна ютолмадинг, аммо нақд 97 очко тўпладинг, мавсум давомида атиги биргина мағлубият. Кейинчалик АПЛни ўзиники қилиб олган Пеп деган даҳо ўша мавсум жамоангдан бир очко кўп жамғариб ғолиб бўлади. Барибир мавсум зўр бўлганди, тасаввур қил – кетма-кет иккинчи йил ЕЧЛ финалига чиқдинг. Бу сафар ютишинг шарт эди, ютдинг ҳам. Аммо кейинчалик ўша мавсумингни одамлар ЕЧЛни  ютганинг билан эмас, ярим финалдаги даҳшатли  камбэкинг билан  эслаб қолади. Ҳайрон бўлма, чунки кимсан «Барселона»дан аввалига 3:0 ютқазиб, сўнгра жавоб ўйинида захира ўйинчинг билан масалани ҳал қилиб кетасан. Арнолднинг машҳур бурчак зарбаси эса ҳаммани жинни қилади.

Бўлди, ЕЧЛ ютиш бўйича 3-ўринга чиқиб олдинг, энди АПЛдаги 30 йиллик қора кунларни аритишинг керак эди. 2019-20 йилги мавсумда сендан фақат АПЛни ютиш сўралди ва ҳаммасини зўр бошладинг, аммо баҳорга келиб кутилмаганда дунёга бир касаллик тарқалди. Дунё бутунлай тинчланиб қолди, шу қатори барча футбол мусобақалари ҳам тўхтаб қолди. Деярли аниқ бўлган чемпионлигинг кечикиб кетди, ёзга бориб бўм-бўш стадионда чемпионликни нишонладинг. Биргина армон қолди, ушбу кунни «қуриб кетгур» вирус сабабли мухлислар билан нишонлай олмадинг, майли муҳими уддаладинг.

Айтганча, ўша баҳорда ЕЧЛ нимчорак финали доирасидаги «Атлетико Мадрид» билан ўйинингда нақд 10 минг киши коронавирусга чалиниб, Британиядаги энг кўп вирус тарқатган тадбирга айланди.

Қилган ишларингдан завқ ол, ётавер, ҳали мураббийликка қайтма, илтимос, бошқа жамоаларни бошқаришингни истамайман. Чунки «Ливерпуль» сени, сен «Ливерпуль»ни топдинг.

Эсим қурсин, 2019 йил ёзида Европа суперкубоги ва йил охирида жамоа тарихидаги илк клублар ўртасидаги Жаҳон чемпионатини ютдинг. Энди фақат Англиядаги АПЛдан нуфузи паст кубоклар қолди, хавотир олма уларни ҳам қўлга киритиб кетасан. 

2020-21 йилги мавсум жароҳатлар билан ўтди, ЕЧЛда чорак финал, АПЛда 3-ўрин. Совринсиз, аммо яхши мавсум бўлганди.

2022 йилги мавсум: ЕЧЛ финали, АПЛда бир очко фарқ билан яна иккинчи ўрин. Яна ўша турнирларни ўзиники қилиб олганларга ютқаздинг. Кел, кўп бу ҳақида гаплашмайлик, биламан, иккимизга ҳам оғриқли. Лекин ўша мавсум Англия Лига кубоги ва Англия кубогини қўлга киритасан ва кейин жамоанг билан эришмаган титулинг қолмайди. Шу сабабми, кейинги мавсумларда жамоангда бироз пасайиш бўлади. Ҳаттоки, сўнги мавсумингда бегоналашиб кетган Европа лигасида ўйинашга ҳам тўғри келди. Шу орада таркибни ҳам анча ўзгартириб юбординг. Эскилардан: Алиссон, Ван Дейк, Робертсон Арнолд ва Салаҳ қолди, холос. Ливерпуль шаҳридаги саргузаштинг мана шундай тугади. Жамоа билан илиқ ва дўстона хайрлашдинг. «Ливерпуль»да кўзойнагингдан ҳам қутулдинг. Эсимда энди жамоага келган вақтингда ҳиссиётга берилувчанлигингдан доим чўнтагингда қўшимча кўзойнак бўларди.

Слот ҳақида ҳам озгина айтиб кетай, мениям вақтим бўлиб қолди, қайтишим керак. Слотни кимлигини сен майдонда қўшиқ қилиб айтганингда билдим. Ундан биринчи мавсумдан кўп нарса кутмадим, ҳали АПЛ ҳавосини кўрмаган, узоқ йил сенга ўрганиб қолган жамоани унга кўникиши қийин бўлади деб ўйлагандим...

Сув ичиб ол, кейин яхши бир янгилик айтаман, фақат ҳаяжонланма, хўпми?

Йўқ, ЕЧЛда афсуски нимчорак финалда ПСЖ пенальтилар сериясида ютиб кетди.

Ҳа, АПЛ! «Ливерпуль»инг чемпионат тугашига 4 тур қолганда АПЛ чемпиони бўлди. Тағин Слот келибоқ бир мавсумда мени унуттирди, демагин. Ўтган йили кетар чоғинг Слот ҳақида қандай қўшиқ куйлаган бўлсанг, у ҳам чемпионликдан сўнг сен ҳақингда ҳудди шундай қўшиқ куйлади.

Аммо шу ерда менга сени ўрнинг билинмоқда. Сен доим чиройли футбол тарафдори эдинг, ғалабами, мағлубиятми доим қувноқ футбол ўйнатардинг.

Яқинда бўлажак чемпионлик парадида жамоа билан автобусда юришга 100 фоиз ҳақинг бор, боргин. Ҳаммаси ўзингни йигитларинг, қолаверса, 2020 йилда мухлислар билан нишонлай олмаган орзуйинг бор.

Майли тонг отиб қолди, мен борай, уйғонишим керак…