Инсоннинг ёзувига қараб унинг ички дунёсини кўриш мумкин, дейишади графологлар. Масалан, сиёсатчиларнинг дастхатлари синчиклаб ўрганилса, улар омма олдида ўзларини қандай тутишади-ю, бошқаларга қандай сиёсат ўтказишга уринишади — билиб олиш мумкин. Графолог Анна Самойленко АҚШнинг янги президенти Жо Байден ҳамда унинг «ўнг қўли» — вице-президент Камала Ҳарриснинг дастхатларини ўрганди.

Жо Байден — қатъиятли етакчи

Графолог тушунтиришича, Байденнинг қатъиятли инсонлигидан далолат берувчи дастхати у ўз президентлик муддати давомида жамиятдаги жаҳон тенденцияларига тезкор жавоб бера олишидан сўзламоқда. Жо Байденнинг интеллектуал бошқарув услуби Доналд Трампнинг агрессив бошқарув услубидан кескин фарқланади.

Анна Самойленко: «Унинг дастхатида у сиёсат одамлар учун хизмат қилиши лозим деган ақидага амал қилишини илғаш қийинмас. Байден инсонларнинг фикрини ҳисобга олади, уларга таянади. Бу ўз мақсадини қондириш йўлидаги яккаҳукмронлик шакли эмас».

Президент имзосида улкан лойиҳаларга айланажак амбициялар ва эълон қилинган мақсадлар сезилади. Бироқ улар амалга ошадими — йўқми, биргина имзодан билиш қийин, аммо улар кўтар-кўтар қилиниши аниқ.

Самойлова, шунингдек, Байденнинг дастхатида стратегик тафаккур, узоқни кўзланган режалар туза олишни кўрган. Янги президентда глобал ислоҳотларга мойиллик ҳам бор.

АҚШнинг ҳозирги етакчиси эътибор марказида бўлишни яхши кўрадиган ва ўз ўрнини ҳеч қачон бировга бериб қўядиганлар сирасидан эмас. Иккинчи даражали роллар — Байден учун эмас. Керак бўлса, сайловчиларининг ишончини сақлаб қолиш, Байден кескин чоралар кўришга-да қодир.

Камала Ҳаррис — ҳиссиётли етакчи

Байден ва Ҳарриснинг дастхатларидаги умумийлик — намойишкороналик. Камала Ҳаррис оташин нутқлари билан кўпчилик диққатини торта олиш қобилиятига эга. Унинг ёзувида танлаган ижтимоий йўналиши аксини топган: «Мен — одамлар учун, мен — одамлар билан биргаман». Графолог вице-президент имижга катта эътибор қаратишини ҳам пайқаган.

Анна Самойленко: «Камала Ҳаррис юксак лавозимда ишласа-да, аёллигини унутмаган илк раҳбарлардан бири бўлиши мумкин».

Ҳарриснинг имзосида ахборотни манипуляция қилиш (камайтириб ёки кучайтириб кўрсатиш) аломатлари бор. Шу боис янги вице-президентдан «айланма» дипломатик жавоблар чиқса ажабланмаймиз. Ҳаррис — энг қийин саволлардан силлиққина чиқиб кета оладиганлар сирасидан бўлиши мумкин: ҳамма нарса ҳақида — аммо ҳеч нарса ҳақида гапиради.