Италия терма жамоаси, гарчи турнир саралаш босқичида омадсизликка учраган бўлса-да, 2022 йили Қатарда ўтадиган жаҳон чемпионатида қатнашиши мумкин. ФИФА мундиал қатнашчилари орасидан Эронни чиқариб юборса, бу иш амалга ошади.

«Football Italia» ёзишича, Халқаро футбол федерацияси Эронда аёллар стадионларга киритилмаётгани боис шу масалани кўриб чиқяпти.

Яқинда бўлиб ўтган Эрон – Ливан ўйинида чипта сотиб олган 2 минг нафар аёл стадионга киритилмади. Норозилик билдириб стадионга киришга уринганларга қарши кўздан ёш оқизувчи баллончаларни қўллашган.

Агарда Эрон жаҳон чемпионати қатнашчилари сафини тарк этса, унда Италия унинг ўрнини эгаллаш учун «биринчи рақамли» номзодга айланади. Сабаби — турнирга йўлланма ололмаган жамоалар орасида рейтинги энг юқори, дейилади хабарда.

P.S.: Қирқ йилдан буён санкцияларга кўмилиб яшайвериб, халқаро чекловларга «иммунитет» орттирган Эрон раҳбарияти битта футболни деб ён берадиганлар хилидан эмас. Жабрини тортадиган оддий халқ (мухлислар) — ёнгинангдаги мундиалга боролмаслик аламли. Шундоқ ҳам Қатар мундиали саралаши сиёсийлашиб кетди... Эронлик футболчилар шунча меҳнат қилиб мундиалсиз қолаверадими, шимолий македонияликларга ўз майдонида мағлуб бўлган италияликларга йўлланма берилиши қолган омадсиз жамоаларда норозик уйғотмайдими? Умуман, футбол — спортми, ё сиёсат? ФИФА жуда кўп саволлар устида бош қотириши керак. Кузатамиз.