Ўзбекистонда Миллий углеродли кредит тизимини яратиш доирасида «Industrial Innovation Group» компанияси билан англашув меморандуми имзоланди, деб хабар бермоқда Экология, атроф-муҳитни муҳофаза қилиш ва иқлим ўзгариши вазирлиги.

Келишувга кўра, «Industrial Innovation Group» компанияси Ўзбекистонда атмосферага чиқарилаётган газларни ҳисобга олиш бўйича миллий реестрни яратишда иштирок этади.

Меморандум Ўзбекистоннинг ташланмаларни камайтириш бўйича миллий стратегиясига мувофиқ тузилган. Бунга қадар Экология, атроф-муҳитни муҳофаза қилиш ва иқлим ўзгариши вазирлиги атмосферага чиқарилаётган газларни ҳисобга олиш бўйича миллий реестрни яратиш ташаббуси билан чиққанди.

Учрашувда Азиз Абдуҳакимов реестрнинг яратилиши иқлим ўзгариши муаммосини ҳал этишда самарали ёндашув эканлигини, мавжуд ташланмаларни тартибга солиш  ва камайтириш бўйича лойиҳаларни рағбатлантириш тизимларини интеграциялашда муҳим аҳамият касб этишини таъкидлаган.

Қайд этилишича, Ўзбекистоннинг биргаликдаги ташланмалар инвентаризацияси мамлакатнинг экологик изларини тўғри баҳолаш ва углеродни назорат қилиш ташаббуслари асосини ишлаб чиқиш учун ишончли ёндашув ҳисобланади. Реестр ташланмаларни мунтазам равишда кузатиб бориш ва углерод хавфини камайтириш лойиҳаларини аниқ баҳолаши мумкин бўлган кенг қамровли платформа бўлиб хизмат қиладиган муҳим ҳаволани яратади.

«Industrial Innovation Group» – бош қароргоҳи БААда жойлашган трансмиллий компаниялар гуруҳи. У мураккаб, юқори технологияли тизимларни яратиш, йирик саноат ва инновацион мажмуаларни лойиҳалаш ва қуриш бўйича 30 йиллик катта тажрибага эга.

Ташкилот турли бизнес тармоқлари учун барқарор йўлларни ишлаб чиқади, углерод хавфини камайтириш ташаббусларини концептуаллаштиради, турли углерод кредит регистрлари учун дизайн ҳужжатларини яратади, шунингдек, у «Hemporama Biochar» номи билан танилган биокўмирнинг глобал ишлаб чиқарувчиси ҳисобланади.