Филиппин суди Магинданао провинциясининг нуфузли клан аъзоси Дату Андал Ампатуан Кичикни 2009 йилги қирғин вақтида 58 кишининг ўлимида айбдор деб топди. Бу ҳақда «CNN Philippines» телеканали хабар берди.

У 40 йил турма ёки умрбод қамоқ жазосига ҳукм қилиниши мумкин.

Унсай номи билан танилган Дату Андаль Ампатуан Магинданаода Дату Унсай шаҳар мэри бўлган. У оила аъзолари ҳам бўлган қуролли гуруҳ билан бирга 58 кишини ўлдирган.

2009 йил ноябрда жанубий Магинданао провинциясида ҳукмронлик қилувчи Ампатуан сиёсий клан тарафдорлари бўлган 100 нафарча қуролланган киши шосседа рақиблари ҳисобланмиш Мангудадату кланига қарашли бешта машинани қўлга олади. Конвой келгусида йилда провинция губернатори сайловларида иштирок этиш учун клан раҳбари Эсмаэл «Тото» Мангудадату номзодини расман рўйхатга қўйиш учун Шариф-Агуак шаҳрига кетаётган бўлган. Номзоднинг ўзи конвойда бўлмаган. Чунки у таҳдидли мактуб олганди. Конвойга эса хотини бошчилик қилган.

Жангарилар 24 кишини турган жойида отиб ташлашган. Қолганлари шосседан 10 километр узоқликда кўмиш учун олдиндан ҳозирлаб қўйилган жойга олиб кетилган. У ерда баъзиларини отиб ўлдиришган, баъзиларини эса мачете билан чопиб ташлашган. Жами 58 киши ҳаётдан кўз юмган.

Филиппин жанубининг аксар қисми турли исёнчи гуруҳлар ва кланларнинг «хусусий қўшини»идан иборат ноҳукумат қўшинлари томонидан назорат қилинади. Улар ўртасидаги зиддият одатда сайловолди кампаниялари бошланиши билан авж олади. Аҳолиси 92 миллион киши бўлган мамлакатда қарийб бир миллиондан ортиқ рўйхатга олинмаган ўқотар қуроллари мавжуд.