Каттақўрғонга таҳририят топшириғи билан бориб, кўп яхши ишларга гувоҳ бўлдик. Туманнинг Жумабой, Навбаҳора ва Мўндиён сингари учта маҳалласида ҳар бири 50 ўринли болалар боғчалари ўз эгаларига топширилди.

Давлатимиз раҳбарининг «2017-2021 йилларда мактабгача таълим тизимини янада такомиллаштириш чора-тадбирлари тўғрисида»ги қарори барча жойларда бўлганидек, Каттақўрғон туманида ҳам ана шундай эзгу ишлар амалга ошишига туртки бўлди.

− Тумандаги барча маҳаллаларда ана шундай давлат ёки шерикчилик асосидаги хусусий мактабгача таълим муассасаларини қуриб, ишга туширамиз, − деди тантаналарда тўпланганларни янги муассаса очилиши ва Наврўз байрами билан табриклаган Каттақўрғон туман ҳокими Аъзамхон Баҳромов. – Боғчаларни тез ва сифатли қуриб берган қурувчиларга ҳам миннатдорчилик билдирамиз. Улар чарчашмасин, ҳали ишларимиз кўп.

− Муҳтарам президентимиз раҳнамолигида жажжи невараларимизга кўрсатилаётган ғамхўрлик миллат келажагига бўлаётган эътибордир, − Навбаҳор маҳалласи фуқароси Самад Ризаев. – Наврўз кунлари қишлоғимизда шинам болалар боғчаси очилгани ҳаммамиз учун байрам совғаси бўлди.

Каримберди Тўрамурод, «Хabar.uz»нинг махсус мухбири,

Шуҳрат Қаршиев, «Каттақўрғон тонги» газетаси бош муҳаррири.