Kattaqo‘rg‘onga tahririyat topshirig‘i bilan borib, ko‘p yaxshi ishlarga guvoh bo‘ldik. Tumanning Jumaboy, Navbahora va Mo‘ndiyon singari uchta mahallasida har biri 50 o‘rinli bolalar bog‘chalari o‘z egalariga topshirildi.

Davlatimiz rahbarining «2017-2021-yillarda maktabgacha ta’lim tizimini yanada takomillashtirish chora-tadbirlari to‘g‘risida»gi qarori barcha joylarda bo‘lganidek, Kattaqo‘rg‘on tumanida ham ana shunday ezgu ishlar amalga oshishiga turtki bo‘ldi.

− Tumandagi barcha mahallalarda ana shunday davlat yoki sherikchilik asosidagi xususiy maktabgacha ta’lim muassasalarini qurib, ishga tushiramiz, − dedi tantanalarda to‘planganlarni yangi muassasa ochilishi va Navro‘z bayrami bilan tabriklagan Kattaqo‘rg‘on tuman hokimi A’zamxon Bahromov. – Bog‘chalarni tez va sifatli qurib bergan quruvchilarga ham minnatdorchilik bildiramiz. Ular charchashmasin, hali ishlarimiz ko‘p.

− Muhtaram prezidentimiz rahnamoligida jajji nevaralarimizga ko‘rsatilayotgan g‘amxo‘rlik millat kelajagiga bo‘layotgan e’tibordir, − Navbahor mahallasi fuqarosi Samad Rizayev. – Navro‘z kunlari qishlog‘imizda shinam bolalar bog‘chasi ochilgani hammamiz uchun bayram sovg‘asi bo‘ldi.

Karimberdi To‘ramurod, «Xabar.uz»ning maxsus muxbiri,

Shuhrat Qarshiyev, «Kattaqo‘rg‘on tongi» gazetasi bosh muharriri.