2023 йил 1 октябрдан кучга кирадиган миллий қонунчиликдаги асосий ўзгаришлар шарҳи Norma.uz портали томонидан тақдим этилди.

Кичик бизнесни қўллаб-қувватлаш дастури амалга оширилади

Тадбиркорлар «Кичик бизнесни узлуксиз қўллаб-қувватлаш» комплекс дастурида иштирок этишлари мумкин бўлади. Бизнесни ривожлантириш банки   дастурни амалга ошириш ва такомиллаштириб бориш бўйича асосий таянч банк этиб белгиланмоқда.

2023-2026 йилларда Дастурни амалга ошириш учун:

• давлат маблағлари ҳисобидан – 6 млрд сўм;
• халқаро молия институтлари маблағлари ҳисобидан – $1,2 млрд йўналтирилади.

Электр таъминоти ва газ учун тарифлар ўзгармоқда 

Ёқилғи-энергетика ресурсларига янги тарифлар белгиланмоқда. Шу билан бирга, жорий куз-қиш мавсумида иссиқлик таъминоти хизматлари бўйича аҳоли учун нархлар оширилмайди.

Олтита ҳудудда кадастр муҳандиси институти жорий этилади 

Кўчмас мулк бўйича кадастр муҳандиси институти уй-жой фондига оид кўчмас мулк объектларига нисбатан Тошкент шаҳри, Тошкент, Навоий, Наманган, Фарғона ва Хоразм вилоятларида жорий этилади.

Давлат сув омборлари ижарага берилади 

Қуйидагилар тадбиркорлик субъектларига «E-auksion» электрон савдо платформасида электрон онлайн аукцион орқали ижарага берилади:

• давлатга тегишли табиий ва сунъий сув ҳавзалари;
• сув омборлари ҳамда дарё атрофидаги қишлоқ хўжалигига мўлжалланмаган ер участкалари.

Зиёратчиларга хизмат кўрсатувчи туроператорлар хизмати баҳоланади 

«Умра» хизматларини кўрсатувчи туроператорлар фаолиятини рейтинг асосида баҳолаш тизими жорий этилади.

Пойтахтдаги ДХШ лойиҳалари учун алоҳида қоидалар

Давлат идораларининг муниципал мулки ҳақидаги маълумотлар «Рақамли Тошкент» дастурига киритилади.

Пойтахтда айрим объектлар (тўлиқ рўйхат – шу ерда) негизида «Тошкент инвест компанияси» АЖ  томонидан қиймати 1 млн АҚШ долларигача бўлган ДХШ лойиҳаларини амалга оширишнинг соддалаштирилган тартиби жорий этилади.

Ижтимоий хизматлар бўйича мурожаатлар -  ягона тизим орқали

«Ижтимоий ҳимоя ягона реестри» ахборот тизими  Президент ҳузурида Ижтимоий ҳимоя миллий агентлиги тасарруфига ўтказилади.

Аҳолига кўрсатиладиган барча турдаги ижтимоий хизматлар ва ёрдамлар, шу жумладан, кам таъминланган оилалар болалари учун нафақа ва моддий ёрдамлар бўйича аризалар мазкур ахборот тизими орқали қабул қилинади.

IT-соҳасини қўшимча қўллаб-қувватлаш чоралари

Тадбиркорлик субъектларига электрон тижорат фаолияти доирасида эркин омбор божхона режимига жойлаштирилган товарлар билан чакана савдо операцияларини амалга оширишга рухсат берилади. 

В2 ва ундан юқори хорижий тил билиш даражасига эга бўлган фуқаролар томонидан тизим бошқаруви, маълумотлар базаси ва «булутли» платформани бошқариш, ахборот хавфсизлигини таъминлаш ва бошқа талаб юқори бўлган йўналишларда халқаро IТ-сертификатларни олиш харажатларининг 100 % қисмини қоплаш тизими жорий этилади.

Лойиҳа ҳужжатларини экспертиза қилиш соҳаси  мутахассислари сертификатланади

Сейсмик хавфсизлиги II-IV тоифадаги бино ва иншоотлар буйича лойиҳа ҳужжатларини ишлаб чиқиш ва экспертизадан ўтказиш, қурилиш-монтаж ишларини бажариш ва назорат функцияларини амалга ошириш йўналишларидаги фаолият юритувчи мутахассисларни сертификатлаш тартиби жорий этилади.

Газ ҳаракати устидан назорат кучайтирилади

Ўзбекистон ҳудудидан табиий газни қувурлар орқали ташиш (транзит) хизматларини кўрсатувчи корхоналар томонидан табиий газни қабул қилиш ва узатиш нуқталарига хрома тограф ҳамда электрон ҳисоблагичлар ўрнатилиши ва солиқ органларининг ахборот тизимлари билан интеграция қилиниши мажбурий ҳисобланади.

Корпоратив муносабатлар соҳаси такомиллаштирилади

Қимматли қоғозлар фонд биржасининг листингига киритилган хўжалик жамиятлари қонунчилик ҳужжатларига мувофиқ ошкор этиладиган ахборот ва ҳисоботлар билан бир қаторда пул маблағларининг ҳаракати ҳамда акциялар чиқаришнинг бир қисми бекор қилинганлиги тўғрисидаги маълумотларни ошкор этади.

Қимматли қоғозлар фонд биржасининг листингига киритилмаган хўжалик жамиятлари рўйхати қимматли қоғозлар бозорини тартибга солиш бўйича ваколатли давлат органи томонидан белгиланадиган муҳим фактларни мажбурий тартибда ошкор этмайди, бундан тижорат банклари, суғурта ташкилотлари ва устав фондида давлат улуши 50 % ва ундан юқори бўлган АЖ, шунингдек уларнинг таркибидаги АЖлар мустасно.

Иш берувчилар БҲМнинг 3 баравари миқдорида субсидия олишлари мумкин

Жазони ижро этиш муассасаларидан озод қилинган шахсларни ишга қабул қилган иш берувчиларга (бюджет ташкилотлари, давлат корхоналари, давлат улуши 50 % ва ундан ортиқ бўлган юридик шахслардан ташқари) БҲМнинг 3 баравари миқдорида бир марталик субсидия ажратилади.

Давлат хизматлари жойларга чиққан ҳолда амалга оширилади

Давлат хизматларини жойига чиққан ҳолда кўрсатиш ёки давлат хизматларидан фойдаланишга ариза юбориш учун Тошкент шаҳрида БҲМнинг 50 фоизи, вилоят марказларида – БҲМнинг 40 фоизи, туман (шаҳар)ларда – БҲМнинг 30 фоизи миқдорида бир марталик тўлов ундирилади.  

Рақобатни ривожлантириш соҳасида янги қоидалар

Эксклюзив ҳуқуқлар берилган хўжалик юритувчи субъектларнинг реестри (рўйхати) жорий этилади ва ушбу реестрни юритиш ҳамда хўжалик юритувчи субъектлар томонидан камситмаслик шартларига риоя этилиши устидан назорат Рақобат қўмитасига юклатилади.

Рақобат қўмитаси битим шартларини, товарлар реализация қилинадиган ҳудудни ва нархни белгилашга бир томонлама таъсир кўрсатиш имкониятига (устун музокара кучига) эга бўлган субъектларни аниқлайди ва улар томонидан устун музокара кучини суиистеъмол қилишни тақиқлайди.

10 млн сўмдан юқори молиявий санкциялар – суд орқали

Тадбиркорлик субъектларига миқдори 10 млн сўмдан юқори бўлган солиққа оид ҳуқуқбузарликлар учун, агар тадбиркорлик субъекти ҳуқуқбузарликни инкор этса, молиявий санкцияларни фақатгина суд тартибида қўллаш амалиёти йўлга қўйилади.