Россиялик отоларинголог Владимир Зайцев коронавирус билан оғригандан сўнг қандай қилиб ҳид билаш қобилиятини тиклаш мумкинлигини айтди.

Мутахассиснинг сўзларига кўра, ҳид билиш қобилияти пасайиши гипосмия, унинг тўлиқ йўқлиги эса аносмия деб аталади. Унинг аниқлик киритишича, касалликнинг сенсориневрал турида — бош миянинг тегишли соҳасига зарар етганда тикланиш жараёни қийинлашади. Кондуктив типда — бурун шиллиқ қавати даражасида муаммолар пайдо бўлганда эса вазият тикланмас ҳолатга келиб қолади.

Зайцевнинг изоҳлашича, COVID-19дан кейин одатда ҳид билиш қобилияти бир ой ичида қайтади. Агар бундай бўлмаса, шифокорга мурожаат қилиш керак: у текширувдан сўнг муолажа тайинлайди.

Шу билан бирга, одам ўзининг ҳид билиш рецепторларини мустақил равишда шуғуллантириши мумкин, дея таъкидлайди шифокор. У махсус салонлардан кичкина шишачада райҳон эфир мойини сотиб олишни ва кунига уч-тўрт маҳал бир неча марта уни ҳидлашни тавсия этади.

«Зинҳор нашатир спирти, сирка, кучли парфюмерия воситаларини ҳидламаслик керак. Кўпчилик шундай қилади. Бу нотўғри. Шиллиқ қават ҳидларни «ажратмайди», агар ўткир ҳидлардан «нафас олса», яхшиликка олиб келмайди. Бу борада райҳон ҳиди жуда яхши ёрдам беради», — деди оториноларинголог.

Зайцевнинг фикрича, ҳид билишни иложи борича эртароқ тиклаш керак, акс ҳолда бу одамнинг руҳий-эмоционал саломатлигига таъсир кўрсатиши мумкин. Масалан, депрессия ҳолатига олиб келиши ҳеч гап эмас. Бундан ташқари, кундалик ҳаётда ҳид билиш газнинг сизиб чиқаётганини аниқлашга ёрдам беради.