«UzAuto Motors» АЖ Кузатув кенгаши компания бош директори лавозимига Янош Ковачни тайинлаш ҳақида қарор қабул қилди.

Компания матбуот хизмати хабарида айтилишича, Венгрияда туғилган Янош Ковач Будапешт Техника Университетининг автомобилсозлик технологиялари бўйича муҳандислик мутахассислигини тамомлаган.

«Ковач жаҳон автомобил саноатининг етакчи топ-менежерларидан бири сифатида General Motors, Opel, GM Powertrain Uzbekistan, UzAuto Peugeot Citroën Automotive ва VinFast Automotive каби компанияларда муҳим раҳбарлик лавозимларида кўп йиллик тажрибага эга.

Ўзининг профессионал фаолияти давомида у сифатни бошқариш, ишлаб чиқариш жараёнларини оптималлаштириш ва автомобил заводлари бошқаруви бўйича масъул бўлган», – дейилади расмий хабарда.

Эслатиб ўтамиз, у 2021 йилдан буён «UzAuto Motors» АЖ Кузатув кенгаши аъзоси ва аудит қўмитаси аъзоси сифатида фаолият юритиб келаётган эди.

Эслатиб ўтамиз, 2024 йилнинг декабрида 2021 йилдан буён «UzAuto Motors» ва «UzAuto Motors Powertrain» компаниялари бош директори лавозимида ишлаб келган Бо Андерссон ишдан олинган эди.