Ҳуқуқни муҳофаза қилувчи идоралар ҳодимлари томонидан ўтказилган тезкор тадбирда Тошкент шаҳри ва Тошкент вилоятида қалбаки 71 200 АҚШ долларининг муомалага киритилишига чек қўйилди.

Хусусан, тезкор Тошкент шаҳрида ўтказилган тезкор тадбирда 1994 ва 2002 йилларда туғилган шахслар ҳар бир қалбаки АҚШ долларини 7500 сўмдан ҳисоблаб, харидорга қалбаки 18 800 АҚШ долларини 141 млн сўмга сотган вақтларида ушланди.

Шунингдек, улардан қўшимча қалбаки 9 500 АҚШ доллари ҳам ашёвий далил сифатида олинди.

Шунингдек, Тошкент вилояти Оҳангарон туманида ўтказилган тезкор тадбирда, Фарғона вилоятининг Олтиариқ туманида яшовчи, 1997 йилда туғилган муқаддам одам савдоси билан боғлиқ жинояти учун судланиб, ҳозирда пробация назоратида бўлган шахс қалбаки 20 минг АҚШ долларини ҳақиқий 14 минг АҚШ долларига сотишга келишиб, харидорга қалбаки 12 000 АҚШ долларини берган вақтида ашёвий далиллар билан ушланди.

Бундан ташқари, унинг яшаш хонадонидан ҳам қалбаки 400 АҚШ доллари тегишли тартибда расмийлаштириб олинди.

Тезкор тадбир давомида, воқеа жойига бирга келган унинг шериги – Олтиариқ туманида яшовчи, 2000 йилда туғилган муқаддам судланган фуқаро бошқарувидаги «Nexia» русумли автомашина кўздан кечирилганда, унинг салонида ҳам қалбаки 10 500 АҚШ доллари борлиги маълум бўлди.

Тезкор тадбир натижасида жами қалбаки 22 900 АҚШ доллари процессуал тартибда расмийлаштириб олинди.

Давлат хавфсизлик хизмати ходимлари томонидан Бош прокуратура ҳузуридаги Департамент билан ҳамкорликда Тошкент туманида ўтказилган тезкор тадбирда эса Андижон вилоятида яшовчи, 1980 ва 1999 йилларда туғилган икки нафар шахс ҳар бир қалбаки 100 АҚШ долларини ҳақиқий 40 АҚШ долларидан ҳисоблаб, харидорга қалбаки 20 000 АҚШ долларини ҳақиқий 8 минг АҚШ долларига сотган вақтларида ашёвий далиллар билан ушланди.

Ҳозирда мазкур шахсларга нисбатан жиноят ишлари қўзғатилган.