Венгрия иштирокида Тошкентда Нобель мукофоти совриндори томонидан кашф қилинган шифобахш ўсимликдан дори воситаси ишлаб чиқарилиши йўлга қўйилиши мумкин. Бу ҳақда  Венгриянинг етакчи иқтисодий нашрларидан бири – «Világgazdaság» сайти маълум қилди.

«Яқинда минг йиллик доривор ўсимлик Венгрия-Ўзбекистон тадқиқот ва инновацион лойиҳасининг асосий элементига айланди. Асосий ишланмалар Дебрецен университетининг фармацевтика факультетида амалга оширилмоқда ва Тошкент дори воситалари ишлаб чиқариш марказига айланиш истагини билдирди», – дея Дебрецен университети декани Илдико Баcкай сўзларидан иқтибос келтирилган мақолада.

Қайд этилишича, доривор ўсимликлардаги фаол моддаларнинг таркиби беқарор ва кўплаб ташқи омилларга, жумладан, иқлим ва тупроққа боғлиқ. Давом этаётган Венгрия-Ўзбекистон илмий-тадқиқот лойиҳаси ушбу омилларнинг айни заводдаги фаол компонентлар таркибига қандай таъсир қилишини ўрганмоқда.

Нашрда лойиҳанинг Ўзбекистон томонидан иштирокчиси Тошкент фармацевтика институти, саноат ҳамкори эса Венгриянинг «Meditop Gyógyszergyártó Kft.» фармацевтика компанияси эканлиги маълум қилинган.

Маълумот учун, 2023 йил июль ойида Венгрия ташқи ишлар ва савдо вазири Петер Сиярто ҳамда Ўзбекистон инвестициялар, саноат ва савдо вазири Лазиз Қудратов Будапештда Ўзбекистон томони Тошкент яқинида Венгрия фармацевтика саноати вакиллари учун махсус иқтисодий зона ташкил этиш ниятида эканлигини маълум қилган эди. 

Эслатиб ўтамиз, Ўзбекистонда ҳам учрайдиган ширин шувоқ минг йиллар давомида хитойликлар ва европаликлар томонидан ишлатилган ўсимликлардан бири бўлиб, 2015 йилда хитойлик тадқиқотчи Ту Юю безгакни даволашда 100 фоиз самарадорликни кўрсатган ширин шувоқнинг фаол компонентини ажратиб олгани ва ундан безгакка қарши дори яратгани учун Нобел мукофотини қўлга киритган.