Сўнгги 22 йилда Ўзбекистонда туберкулёз билан касалланиш даражаси 2 баробардан, ўлим кўрсаткичи эса 10 баробардан кўпроқ камайишига эришилди.

Бу ҳақда ССВ мтатбуот хизмати маълум қилди.

Ўз навбатида, 1-тур сезувчан туберкулёзга чалинган беморларни даволаш самарадорлиги кейинги йилларда 90 фоизга етказилган ва бу ЖССТнинг хасталикни тугатиш стратегияси мақсадларига мос.

Шунингдек, силнинг турғун шаклидан азият чекаётган беморларни даволаш самарадорлиги 91,2 фоиздан 95 фоизгача оширилиб, муолажа муддати 2 йилдан 6-9 ойга қисқарди. Бу — дунёнинг жуда кам сонли давлатлари эришган кўрсаткичдир.

– Авваллари касалликни лаборатор усулда аниқлаш учун 3 ойгача вақт кетарди, – дейди Республика ихтисослаштирилган фтизиатрия ва пульмонология илмий-амалий тиббиёт маркази директори Наргиза Парпиева. – Ҳозир эса юртимиз бўйича 136 та ген-молекуляр анализатор аппарати келтирилиб, 97 та замонавий лаборатория ташкил этилган. Улардан 40 таси туманларда фаолият кўрсатмоқда.

Бундан ташқари, балғам намуналарини туман (шаҳар)лардан асосий лабораторияларга ўз вақтида олиб келиш учун логистика хизмати яхшиланган. Ташхис қўйиш учун сунъий интеллект билан жиҳозланган 46 та ультрапортатив рентген аппарати жойларга етказиб берилган. Улар ёрдамида, ҳатто, оғир ётиб қолган беморлар хонадонигача борилиб, ўпка ва кўкрак қафасида қандай патологик жараёнлар кечаётганлиги тезкор равишда аниқланмоқда.

14 ёшгача бўлган хавф гуруҳига мансуб аҳоли қатламида иммунодиагностика усулида, 14 ёшдан катталарда эса рентген усулида туберкулёзни аниқлаш йўлга қўйилиб, илк маротаба 10 та вилоятда «Ўпка саломатлиги» мобил бригадалари ташкил этилди. 

Туберкулёз хасталиги тарқалишининг олдини олиш учун янги туғилган чақалоқларни эмлаш қамрови 99,5 фоизга етказилди.

Маълумот учун, Жаҳон соғлиқни сақлаш ташкилоти ўтган йили дунё бўйича 10,8 миллион кишига туберкулёз ташхиси қўйилгани ва улардан 1,25 миллион нафари касаллик оқибатида ҳаётдан кўз юмгани ҳақида ҳисобот берган.