АҚШ фуқаролигини олган ўзбек қўшиқчиси Наргиз Зокирова 2072 йил майгача Россияга киролмайди, рус ҳукумати уни депорт қилган.

Аввалроқ унинг Москвага боргани ва ушлангани хабар қилинган, кейинроқ рад этилганди. У Москвага учиб бормаган, аммо депорт ҳақидаги ҳужжат имзоланиб бўлган.

Ушбу ҳужжатни хонанданинг адвокати Баҳром Исмоилов ҳам тасдиқлаган. Депортнинг сабаби расман маълум қилинмаган, бироқ бир неча тахминлар бор.

Масалан, Зокирова рус-украин низоси ҳақида Россияга қарши кескин чиқишлар қилган, буни рус ҳукуматининг бир қатор вакиллари ҳам таъкидлаган. Хусусан, Дума депутати Елена Драпека хонандани «ресторан қўшиқчиси» деб таърифлаган.

«Ҳукуматимиз тўғри қиляпти: Россияни ёмон кўрадиган ва уни ҳақорат қиладиганларни келган жойига қайтариб юбориш керак. Улар ўзларига қулай ва яхши бўлган бошқа давлатни топсин», деган депутат.

Шунингдек, депорт ҳақидаги ҳужжатдан англанилишича, Зокировага айнан Украинадаги махсус операция ҳақида фикрлар билдиргани учун тақиқ қўйилган. Ва бундай тақиқларни олган бошқа рус артистлари ҳам бор, кўпчилиги Исроилдан ва бошқа мамлакатлардан қўним топган.

Охирги тахминга кўра, хонанда ОИТС юқтириб олган бўлиши мумкин. Ижтимоий тармоқларда унинг жиддий касалликка чалингани ҳақида хабарлар тарқатилган, аммо бу ҳозирча расман тасдиқланмаган.