Буюк Британия соғлиқни сақлаш вазири Мэтт Ҳэнкок ҳукумат коронавируснинг янги тури бўйича вазият назоратини қўлдан бой берганини таъкидлади. Бу ҳақда «Sky News» ёзмоқда.

«COVID-19нинг янги штамми назорати йўқотилди, энди одамлар, айниқса, Англиянинг энг қаттиқ чекловлар жорий этилган ҳудудларида яшовчилар, ўзларини худди вирус бордек тутишлари лозим», — огоҳлантирди амалдор.

Вазир қўшимча қилишича, барча Рождествони интиқлик билан кутяпти, бироқ COVID-19нинг тез юқувчан янги тури шиддат билан тарқаётганини инсобатга олган ҳукумат қатъий чораларни қўллашга мажбур бўлмоқда.

Ҳэнкок кучайтирилган чоралар, то вакцина жорий этилмагунича, бир неча ой давом этиши мумкин деди.

«Коронавируснинг бу штамми — улкан муаммо. <…> Бу қаттиқ назорат қилишимиз шарт бўлган ўлимга олиб келувчи инфекция эди, бироқ COVID-19нинг янги мутацияси ишимизни оғирлаштириб юборди», — деди у.

Вазир, ўз навбатида, янги локдаун кучга кириши арафасида Лондонни тарк этиш мақсадида минглаб одамлар вокзалда тўпланганини ўта масъулиятсизлик деб атади.

Коронавирусга қарши қаттиқ чораларни жорий этиш масаласида январь ойида депутатлар овоз беришади. Ушбу чекловлар пойтахт Лондон, Англия жануби-шарқи ҳамда шарқий ҳудудларининг айрим қисмларини ўз ичига олиши кутиляпти.

Мутахассисларга кўра, Британияда тарқаган коронавируснинг янги мутацияси одатдагисидан 70 фоиз юқумлироқ бўлиши мумкин. Аммо у олдингисидан кўпроқ ўлимга сабаб бўлиши борасида ҳозирча етарлича далиллар йўқ.

Коронавирус мутациясидан сўнг Лондон ва Англия жануби-шарқида энг қаттиқ чекловлар жорий этилган.

Буюк Британияда пандемия даврида COVID-19 қайд этилиши 2 миллионтадан ошиб кетди, қурбонлар сони эса қарийб 68 минг нафарга етган.