Матолардан санъат асарини яратиш – тикувчилик қадимдан қадрланган, энг кўп эҳтиёж сезилган ҳунарлардан бири. Бирор-бир қизалоқ йўқки, онаси ёки бувисининг қўлига игна тутганча ниманидир тикаётганига тақлид қилиб кўрмаган бўлса. Самарқандлик Зулайҳо Холмуродова ҳам ана шундай орзули қизалоқлардан бири эди. Бугун у ўша орзуларига эришган аёл: пардалар бизнесида «Arzu by Zulayho» брендининг эгаси, тадбиркор.

«Илк марта 4-синфлигимда қўлимга игна тутганман. У пайтлар оиламизнинг иқтисоди ҳам ҳаминқадар эди. 7-синф бўлганимда эса қўшнимизга тикувчиликни ўрганиш учун шогирд тушганман. Мактабда ўқишларим яхши, айниқса, расм ва чизмачилик фанларини яхши кўрар эдим.
Бир муддат ўтиб, шу ҳунарнинг сир-асрорларини ўргана бошладим ва ҳатто, кичик-кичик буюртмаларни ҳам бажариб берганман», – дейди Зулайҳо Холмуродова.

У кейинчалик тикувчиликнниг турли йўналишларида ўз ўрнини топишга ҳаракат қилди: костюм-шим ҳам, аёллар кийими ҳам, қўйингки, мижознинг бюртмасига қараб турли нарсаларни тикди.

Парда тикиш соҳасига, аввалига қизиқиш, кейинчалик эса профессионал устоздан ўрганиш босқичларидан ўтиб кириб келади. «Зулайҳо дизайн» пардалар салонини очганидан сўнг эса, тадбиркорликни қонуний йўлга қўйгани сабабли давлат ташкилотларининг буюртмаларини бажаришга тўғри келган ва бу унга илк юқори даромадларни келтиришни бошлаган.

Зулайҳо Холмуродова бугун ўз бизнесини йўлга қўйган, истиқболда қатор лойиҳаларни режалаштираётган тадбиркор. «Arzu by Zulayho» бренди остида фаолият кўрсатадиган пардалар салони ва дўконлар эгаси.

У ҳар бир пардага санъат асари сифатида қарайди. Премиум сифат, махсус дизайн ва мукаммал тикув эса унинг ҳаётий шиори.

«Хонадонингизни нафислик билан безанг», – дейди бренд асосчиси.