БМТ Бош котиби Гутерриш иккинчи муддатга ҳам номзодини қўймоқчилиги ҳақида хабар бергандик.

Бирлашган Миллатлар Ташкилоти Бош ассамблеяси иккинчи марта ташкилотнинг бош котиби этиб Aнтониу Гутерришни тайинлади, унинг ушбу лавозими кейинги муддати 2022 йил 1 январдан 2026 йил 31 декабрига қадар давом этади, дея эълон қилди БМТ Бош ассамблеяси раиси Волкан Бозкир.

«Бош ассамблея резолюцияни аккламация йўли билан қабул қилмоқчи. Қарор қабул қилинди. Жаноби Олийлари Aнтонио Гутерриш 2022 йил 1 январдан 2026 йил 31 декабригача иккинчи муддатга Бирлашган Миллатлар Ташкилотининг Бош котиби этиб тайинланганини эълон қилиш шарафига муяссар бўлдим», — деди Бозкир.

Жума куни қабул қилинган резолюцияда БМТ Бош ассамблеяси Гутерришни 2022 йил 1 январдан 2026 йил 31 декабригача бўлган муддатга Бирлашган Миллатлар Ташкилотининг Бош котиби этиб тайинлади.

Гутерриш бош котиб лавозимига ягона номзод эди. Биринчи марта бу лавозимни у 2017 йил 1 январда қабул қилиб олган. Ташкилотнинг бош котиби беш йиллик муддатга сайланади.

Гутерриш БМТнинг тўққизинчи Бош котиби ҳисобланади. Трюгве Ли (Норвегия) жаҳон ташкилотининг биринчи бош котиби бўлган. Ундан кейин ушбу лавозимни Даг Хаммершельд (Швеция), У Тан (Мьянма), Курт Вальдхайм (Австрия), Хавьер Перес де Куэльяр (Перу), Бутрос Бутрос-Гали (Миср), Кофи Аннан (Гана), Пан Ги Мун (Жанубий Корея) эгаллаган.