Ноябр — кузнинг сўнгги ойи ва у одатда ҳароратнинг кескин ўзгариб туриши билан тавсифланади. Ноябр ойининг ўртача ҳарорати октябр ойига нисбатан 5-7 даражага паст бўлади.

2023 йил ноябр ойи қандай бўлади?

Октябр ойининг охирги кунида ёғиб ўтган ёмғир ва совуқдан сўнг, ноябрь қуруқ ва анча илиқ об-ҳаво билан бошланади.

Ойнинг биринчи беш кунлигида Ўзбекистоннинг барча ҳудудлари бўйича ҳаво бироз булутли бўлади, баъзи жойларда ўзгариб туради, ёғингарчилик кутилмайди. Шамол бироздан ўртача тезликкача эсади.

1 ноябрда кундузи ҳаво ҳарорати 17-19 даража илиқ бўлади, 2-5 ноябрь кунларига 21-24 даража илиққача аста-секин кўтарилади. Фақат кечаси ва эрталаб 5-10 даража илиқ бўлган ҳарорат билан салқин бўлиши кузатилади.

Кейинчалик, ойнинг охиригача, Ўзгидрометнинг дастлабки баҳолашига кўра, 2023 йил ноябрь ойида республика ҳудудининг катта қисмида ҳарорат кечалари 5-10 даража илиқдан 0-5 даража илиққача, кундуз кунлари 15-20 даража илиқдан 7-12 даража илиққача ўзгариб туриши кутилмоқда. Совуқ ҳаво даврларида эса кечаси ва эрталаб 0-2 даража совуққача бўлиши мумкин.

Республика шимолида анча паст ҳарорат фонида — ҳарорат кечалари 2-7 даража илиқдан 2-7 даража совуққача, кундуз кунлари 10-15 даража илиқдан 7-12 даража илиққача ўзгариб туриши кутилмоқда.

Ушбу ноябрь ойида ёғингарчилик меъёр атрофида, баъзи жойларда меъёрдан кўп бўлиши кутилмоқда. Ёғингарчилик асосан ёмғир кўринишида ёғади, совуқ даврларда эса қорга айланади.