Фарғона вилояти божхона бошқармаси Контрабанда ва божхона қонунчилиги бузилишига қарши курашиш бўлими ходимлари томонидан 15 ноябрь куни тезкор тадбир ўтказилди.

Давлат божхона қўмитаси Ахборот хизматининг «Xabar.uz»га маълум қилишича, «Водил-Фарғона» йўналишида ҳаракатланаётган фуқаро М.И бошқарувида бўлган «Нексия» русумли автомашина тўхтатилган. Бу пайтда ҳайдовчи боши берк кўчага кириб қолгани учун жавобгарликдан қочиш мақсадида машинага ортилган юкларни ташқарига улоқтира бошлаган.

Автомашина холислар иштирокида кўздан кечирилганда, муқаддам қўшни давлатдан айланма йўллар орқали олиб кирилган, хорижда ишлаб чиқарилган, божхона расмийлаштирувидан ўтганлигини тасдиқловчи ҳужжатлари бўлмаган 12 дона «LED TV» номли 32 дюмли  телевизорларни автомашинасига юклаб олиб кетаётганлиги аниқланди. Мазкур телевизорларнинг умумий қиймати 13,2 млн. сўмни ташкил этмоқда. Ҳозирда мазкур ҳолат юзасидан божхона текширувлари давом эттирилмоқда.

Таъкидлаш жоизки, жисмоний шасхлар эндиликда шахсий фойдаланиш мақсадидаги телевизорларни 6 календарь ойида 1 маротаба олиб киришлари мумкин.