«Forbes»нинг ёзишича, ўн еттинчи марта тузилаётган сайёрамизнинг энг нуфузли 100 аёли рейтингига дунёнинг 30 мамлакатида истиқомат қилувчи аёллар киритилган. Улар орасида 10 та давлат раҳбари, 38 та компания бош директори ва 5 та кўнгилочар соҳа вакиллари бор.

Хабарга кўра, рўйхатдаги биринчи ўринни ўн йилдирки Германия канцлери Ангела Меркель эгаллаб келмоқда. Иккинчи поғонадан кетма-кет икки йилдан бери Европа Марказий банки раҳбари Кристин Лагард жой олмоқда. Учинчи ўрин АҚШ вице-президентлигига номзод Камала Харрисга насиб этган.

Рейтинг иштирокчиларининг баъзилари, айниқса, коронавирусга қарши самарали чоралари билан ажралиб туришди, дея таъкидлайди «Forbes». Янги Зеландия Бош вазири Жасинда Ардерн (23-ўрин) «қатъий локдаун ва карантин чоралари ёрдамида вируснинг биринчи ва иккинчи тўлқинларини енгди». Тайвань маъмурияти раҳбари Цай Инвэнь (37-ўрин) «яқин алоқаларни кузатишни» ташкил этиши натижасида оролда атиги еттита ўлим ҳолати қайд этилди.

Рейтингдан, шунингдек, миллиардер Билл Гейтснинг рафиқаси Мелинда (5-ўрин), YouTube раҳбари Сьюзен Войжитски (13-ўрин), Буюк Британия қироличаси Елизавета II (46-ўрин), дунёдаги энг бой одам Жефф Безоснинг собиқ рафиқаси Маккензи Скотт (67-ўрин) ва хонанда Рианна (69-ўрин) жой олган.

Россия Федерацияси Марказий банки раҳбари Элвира Набиуллина учинчи бор «Forbes» талқинига кўра дунёнинг энг нуфузли 100 аёлидан бири бўлди. Бу йил у рейтингдаги 53-ўринни эгаллади.

«Россиянинг рейтингдаги ягона вакили учинчи йил кетма-кет Марказий банк раиси Элвира Набиуллина ҳисобланади. Бир йил ичида у 57-поғонадан 53-ўринга кўтарилиб олди», — деб ёзади «Forbes».