2 март куни Капитал бозорини ривожлантириш агентлиги томонидан АТБ «Ўзсаноатқурилишбанк» гуруҳига кирувчи «SQB Securities» масъулияти чекланган жамиятига лицензия берилди. Янги компания инвестицион воситачи, инвестицион консультант, шунингдек, инвестицион активларнинг ишончли бошқарувчиси ҳисобланади.

«SQB Securities» директори Амур Жалилов таъкидича, компания халқаро капитал бозорига чиқиш ҳамда халқаро ва маҳаллий бозорлар ўртасида асосий боғловчилик ўрнини мустаҳкамлашга эътибор қаратади. Шу мақсадда ҳам маҳаллий, ҳам халқаро ҳамкорлар билан инвестиция-банк соҳасида ҳамкорликни мустаҳкамлаш орқали капитал бозорига инновацион ечимлар, маҳсулот ва хизматлар татбиқ этилади.

Капитал бозорини ривожлантириш агентлиги директори Отабек Назиров тижорат банкларининг капитал бозорига профессионал иштирокчилар сифатида фаол кириб келишини олқишлади. «Биз компанияларимизнинг хусусийлаштириш жараёнида чет эллик инвесторларнинг фаол иштирок этишларини таъминлаш ҳамда капитал бозорининг ликвидлигини ошириш учун банкларимиз ва халқаро инвестиция компаниялари ўртасида ҳамкорлик муносабатларини ривожлантириш ниятидамиз», — деди жумладан О.Назиров.