Тошкент шаҳар ИИББ ППХ бригадаси 1 батальон сафдор ходимлари Мадина Турсунхўжаева ҳамда Бекмурод Раҳматалиевлар пойтахтимиздаги «Hyatt Regency» меҳмонхонаси атрофида ҳушёрлик билан хизмат олиб боришарди. Бу жойга байрамни нишонлаш учун кўплаб фуқаролар ташриф буюрган, мамлакатимизнинг турли вилоятларидан келган меҳмонлар ҳам бор.

Шу пайт ходимларга бир аёл билан эркак мурожаат қилишди. Ўзини Фарруҳ деб таништирган йигит оиласи билан байрамни нишонлаш учун Самарқанд вилоятидан келган экан. Кўпчилик ичида уларнинг 4 ёшли қизи Мадина йўқолиб қолибди. Ҳар қанча излаб топиша олмагач ички ишлар органлари ходимларидан ёрдам сўрашга қарор қилишибди.

Осойишталик посбонлари боланинг кийимлари, кўринишини сўраб олгач, болани излашга киришиб кетдилар.

— Одамлар кўп бўлса-да, қизалоқни топиш унчалик қийин бўлмади, — дейди сафдор М. Турсунхўжаева. — Арча атрофида ўйнаб юрган болаларнинг кўпчилиги бир бирига ўҳшаш кийим кийган эди. Аммо атрофга зир югурганча йиғлаб юрган кичкинтой дарров эътиборимизни тортди.

Ходимлар қизалоқ билан суҳбатлашиб, айнан улар излаган бола шу эканини билишди. Кичкинтой ярим соатда топилиб ота-онасининг бағрига топширилди. Қизалоқини бағрига босаётган, қувончдан кўзлари намланган онани кўрган киши, улар кўришмаганига кўп йиллар бўлган шекилли деб ўйлаши мумкин.

— Ички ишлар органлари ходимларининг борига шукур, — дейди қизалоқнинг онаси Зухра Абдусаидова — Қўрқувга айланган байрам кайфиятимиз яна аслига қайтди. Қизалоғимни топиб келгунларича ўтган ярим соат йилдек ўтди гўё. Халқимизнинг бахтига осойишталигимиз, хотиржамлигимиз, қувончимиз посбонлари омон бўлишсин.

Шу ўринда ота-оналардан илтимос қилиб қолардикки, байрам кўнгилдагидек ўтиши, шу каби холатларга тушмаслик учун фарзандлирингизга ҳушёр бўлинг, кичкинтойларнинг қўлларидан ушлаб олинг. Барчага байрам муборак.

ИИВ Патруль-пост хизмати ва жамоат тартибини сақлаш бош бошқармаси