Тошкентда овқатдан оммавий заҳарланиш бўлгани ва у «Оқтепа лаваш» умумий овқатланиш шохобчаларида тайёрланган товуқли сендвични истеъмоли билан боғлангани ҳақида аввал хабар қилинганди.

Бош прокуратура мазкур ҳолат юзасидан маълумот берди.

2019 йилнинг 4-7 июнь кунлари Тошкент шаҳрида истиқомат қилувчи жами 49 нафар фуқаролар «овқатдан токсикоинфекция» ташхиси билан Ўзбекистон Республикаси ССВ ЭМЮКИТИ, 2 ва 5-сонли юқумли касалликлар шифохоналарига ётқизилган.

Мазкур ҳолат юзасидан ўтказилган текширувда, ушбу фуқаролар шифохонага мурожаат қилишидан аввал Учтепа тумани, Лутфий кўчаси, Сергели тумани, Янги Қўйлиқ кўчаси, 7б-уй ҳамда Сергели тумани, Янги Сергели кўчаси, 21-уйда жойлашган «Оқтепа лаваш» («Grand Azia Plus» МЧЖ) умумовқатланиш тармоғининг учта шохобчаларида тез тайёрланувчи таомларни («сендвич», «лаваш» ва «пицца») истеъмол қилганликлари аниқланган.

Мазкур ҳолат юзасидан 07.06.2019 йилда Тошкент шаҳар прокурори томонидан «Grand Azia Plus» МЧЖ мансабдор шахслари ва бошқаларга нисбатан Ўзбекистон Республикаси Жиноят кодексининг 186-моддаси 4-қисми «б» банди билан жиноят иши қўзғатилган.

Ҳозирда жиноят иши бўйича Тошкент шаҳар прокуратураси томонидан тергов ҳаракатлари олиб борилмоқда, дейилади хабарда.