«Ўзбекистон темир йўллари» орқали қўшни давлатга салкам 800 қути тамаки маҳсулотларини яширин равишда олиб чиқилишига чек қўйилди.

Бу ҳақда Xabar.uzга вилоят Божхона бошқармаси ахборот хизмати раҳбари Дурдона Қаюмова маълум қилди.

Таъкидланишича, «Ўзбекистон темир йўллари» состави орқали хорижий давлатдан мамлакат ҳудудига кириб келган контейнерлар транзит йўналишда ҳаракатланиб, қўшни  давлатга етиб бориши керак бўлган. Жорий йилнинг 2 ноябрь куни вилоят божхона бошқармасининг «Хўжадавлат» темирйўл чегара божхона постида товар-моддий бойликларни турли яширин йўллар билан олиб чиқишга бўлган уринишларни батараф этиш мақсадида шу йўналишдаги составда назорат рейди ўтказилган. 

Барча юк контейнерлари белгиланган тартибда инспекцион кўрик орқали текширилган. Бунда контейнерлардан бирининг юк кузатув ҳужжатларида «Аввал муомалада бўлган автомобиль эҳтиёт қисмлари» дея қайд этилган  товарлар ва инспекцион кўрик мажмуасининг рентген тасвирлари  ўзаро мос келмагани божхона ходимларида шубҳа уйғотган. Ўрганувларга кўра, Бухоро ҳудудини кесиб ўтувчи темирйўлдан хорижга олиб чиқилаётган бу «автоэҳтиётқисмлар» аслида, тамаки маҳсулотлари экани аниқланган. 719 та йирик қутиларда яширин равишда олиб чиқилаётган ушбу маҳсулотлар ушлаб қолинган.

Тамаки маҳсулотлари вақтинча сақловга олинган. Ҳозирда ҳолат юзасидан суриштирув ишлари олиб борилмоқда.