«Fiat Chrysler» ва «Peugeot» бирлашади — дунёдаги тўртинчи йирик автомобилсоз пайдо бўлади
АҚШ-Италия ҳамкорлигидаги «Fiat Chrysler Automobiles NV» (FCA) ва Франциянинг «PSA Group» акциядорлари кеча, душанба куни компанияларнинг бирлашишини маъқуллади, натижада жаҳондаги тўртинчи йирик автомобилсоз пайдо бўлмоқда, хабар берди «Bloomberg».
«MarketWatch» хабарига кўра, «PSA Group» акциядорларининг 99,85 фоизи бирлашишни маъқуллаган. Битим расмийлаштирилиши март ойи охирига қадар якунига етади.
Бирлашган компания — «Stellantis» ўз соҳасида «Volkswagen», «Renault-Nissan» ва «Toyota Motor»дан кейинги дунёдаги тўртинчи йирик ишлаб чиқарувчига айланади.
«Stellantis» компанияси «Jeep», «Fiat», «Dodge», «Maserati», «Peugeot», «Citroen» ва «Opel» русумли автомобиллар ишлаб чиқаради.
Бирлашган компанияга PSA бош ижрочи директори Карлос Таварес раҳбар бўлиши кутилмоқда.
Душанба куни Париж биржасида «Peugeot SA» акциялари 3,4 фоизга, Милан биржасида «Fiat Chrysler Automobiles NV» акциялари 3 фоизга қимматлашган.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter