Украина президенти Владимир Зеленский Американинг НВО телеканалига берган интервьюсида мамлакатнинг НАТОга кириши муҳим эканини таъкидлади.

Зеленский АҚШ президенти Жо Байден Евровада хавфсизликни таъминлашга катта эътибор қаратиш ниятида экани, бу борада Украинанинг НАТОга тўлақонли аъзо бўлиши алоҳида аҳамият касб этишини қайд этди. 

«Агар Украина НАТО аъзоси бўлганида, Украина шарқида беқарорлик юзага келмас эди», – деди В.Зеленский.

Суҳбат давомида Украина етакчиси АҚШнинг янги раҳбари Жо Байден билан илк учрашувда «Жаноб президент, биз нега ҳалигача НАТО таркибида эмасмиз?» деб сўрашини маълум қилди. Зеленский бунга жавобан Байден расмий Киевнинг НАТОга аъзо бўлиши учун кўмак ваъда этишига умид қилмоқда.

Зеленский расмий Москва айирмачиларни дастаклаш орқали Украинада яхлит бошқарувни заифлаштириш ва мамлакатни федерал бошқарувга ўтказишга уринаётганини қайд этган. Донбассдаги зиддиятни бартараф этиш мақсадида ташкил этилган «Норманд формати» (Украина, Россия, Германия, Франция) самарали ишламаётганини таъкидлаган Зеленский унга АҚШни ҳам қўшишни таклиф этган.

Украина раҳбари, шунингдек, АҚШ Киевга етарли миқдорда ҳарбий ёрдам бермаётганидан ёзғириб, кўмак кўламини оширишни сўраган. 

Аввалроқ, 2020 йил декабрь ойида «New York Times» нашрига интервьюсида ҳам Зеленский Жо Байден собиқ президент Трампга қараганда Украинани яхшироқ билишини таъкидлаган ва унинг даврида икки мамлакат робиталари янада яқинлашувига умид билдирган эди.

Дарвоқе, Зеленскийнинг интервьюси НВО канали эфирида кетганидан кўп ўтмай, АҚШ Давлат котиби Энтони Блинкен Украина ташқи ишлар вазири Дмитрий Кулеба билан телефон орқали суҳбатлашди. Мулоқот чоғи Вашингтон Киевга катта иқтисодий ва ҳарбий кўмак ваъда қилди.