Туркиянинг Халқ Республикачилар партияси (CHP) томонидан президентликка номзоди қўйилган Истанбул мэри Экрем Имамоғлунинг ҳибсга олиниши ортидан Туркияда оммавий намойишлар бошланиб кетди.

Намойишчилар амалдаги президент Эрдўғонга мухолиф саналаётган Имамоғлунинг ҳибсланишини сиёсий қатағон деб атамоқда. Мамлакатнинг турли ҳудудларида мэрнинг ўн минглаб тарафдорлари лозунг ва шиорлар кўтариб кўчага чиққан.

Маълумот учун, сешанба куни Истанбул университети Туркия Бош прокуратурасининг сўровига биноан Имамоғлунинг дипломини бекор қилганини эълон қилган эди. Бу унга президентликка номзодини қўйишга тўсқинлик қилади.

Чоршанба куни эса, маҳаллий ОАВ ҳуқуқ-тартибот идоралари Имамоғлунининг уйида тинтув ўтказгани ва унга алоқадор юзга яқин кишига нисбатан ҳибсга олиш ордерлари берилгани ҳақида хабар тарқатди.

Истанбул прокуратураси Экрем Имомоғлу ва бошқаларни турли жиноятлар, жумладан, жиноий ташкилотчилик, тамагирлик, порахўрлик, фирибгарлик ва ноқонуний тендерларда гумонламоқда.

Ўз навбатида, Истанбул мэри «буюк зулмга дуч келгани, аммо таслим бўлмаслиги»ни, курашни давом эттиришини айтган мурожаати тарқалди.