АҚШ президенти Дональд Трамп Украина президенти Владимир Зеленскийни диктатор деб атаганини рад этди.

Трамп Буюк Британия бош вазири Кир Стармер билан Оқ уйда учрашувдан кейин журналистлар саволларига жавоб қайтарган. ОАВ ходимларидан бири Трампдан «Cиз ҳали ҳам Зеленскийни диктатор деб ҳисоблайсизми?» деб сўраган. «Мен шундай дебманми? Ақл бовар қилмайди», дея аввалги баёнотидан тонган АҚШ раҳбари.  

Аввал хабар берганимиздек, Трамп маъмурияти Киевга кўрсатилган молиявий ва ҳарбий кўмак эвазига Украина ҳукуматидан АҚШга 500 миллиард долларлик фойдали қазилмалардан фойдаланиш ҳуқуқи берилиши кўзда тутилган битим таклиф қилганди. Бу битимни Зеленский рад этган.

Трамп АҚШ Украинага 2022 йил февралдан буён, яъни Россия агрессияси бошланганидан кейин 350 миллиард доллар кўмак кўрсатганини айтган. Аммо Зеленский Қўшма Штатлар кўрсатган жами кўмак 100 миллиард долларга яқин экани, у ҳам қарз эмас, грант кўринишида берилганини маълум қилган.

Эътирозли баёнотлар ортидан Трамп Зеленскийни бир неча бор кескин танқид қилган. Жумладан, президент сайлови ўтказмаётгани важидан уни «диктатор» деб атаган ва рейтинги 4 фоизга тушиб кетганини иддао қилган.

Пировардида Зеленский Украинада тинчликка эришиш ва мамлакатнинг НАТОга аъзо бўлиши учун президентликдан кетиши шарти қўйилса, бунга рози эканини билдирган.