АҚШ президенти Доналд Трамп Украина президенти Владимир Зеленскийга қўнғироқ қилди.

Суҳбат тахминан бир соат давом этди.

Кейинроқ АҚШ президенти Truth Social ижтимоий тармоғида Украина раҳбари билан “жуда яхши” телефон суҳбати ўтказгани ҳақида ёзди. “Муҳокамаларнинг катта қисми Россия ва Украинанинг сўров ва эҳтиёжларини мувофиқлаштириш бўйича президент Путин билан кечаги суҳбатга асосланди”, — деб ёзади у.

Трамп шунингдек, давлат котиби Марко Рубио ва миллий хавфсизлик бўйича маслаҳатчи Майкл Уолцдан суҳбатнинг батафсил тавсифини тақдим этишни сўрашини ва у яқин орада эълон қилинишини қўшимча қилди.

Бир кун аввал Трамп Владимир Путин билан телефон орқали суҳбатлашганди. Давлат раҳбарлари мамлакатлар ўртасидаги муносабатларни, шунингдек, Россия ва Украина ўртасидаги урушни тўхтатиш бўйича вақтинчалик ўт очишни тўхтатиш келишуви шартларини муҳокама қилди. Жумладан, 30 кун давомида энергетика иншоотларига зарба бермасликка келишилди. Аммо Владимир Зеленский Россия мазкур келишувни бузаётганини иддао қилди.

Британия оммавий ахборот воситалари Трамп-Путин суҳбатини сўнгги пайтларда сайёрадаги энг муҳимларидан бири деб атади.