АҚШ президенти Доналд Трамп Алкатрас оролидаги ўта хавфли жиноятчилар учун қамоқхона қайта очилишини маълум қилди.

«Авваллари – биз жиддийроқ давлат бўлганимизда, энг хавфли жиноятчиларни улар зарар етказиши мумкин бўлган одамлардан узоқлаштиришдан – қамоқхоналарга ташлашдан ҳеч қандай хижолат тортмасдик. Аслида шундай бўлиши ҳам керак», – деб ёзган Трамп Truth Social тармоғидаги саҳифасида.

Унинг сўзларига кўра, у қамоқхоналар бюросига «Американинг энг шафқатсиз жиноятчи ва рецидивистларини жойлаштириш учун» Алкатрасни қайта очиш ва таъмирлашни буюрган. Бироқ пост эълон қилинганидан кейин Трамп Оқ уйда журналистларга Алкатрасни очиш «бу шунчаки ғоя» эканини айтган.

АҚШ Конгресси вакиллар палатаси вакили ва собиқ спикери, демократ Ненси Пелоси Трампнинг Алкатрас борасидаги гапларини «жиддий эмас» деб атади. Хусусан, у Алкатрас бир неча ўн йиллар давомида машҳур сайёҳлик маскани бўлиб келганини эслатди.

Эслатиб ўтамиз, Алкатрас қамоқхонаси 1963 йил 21 мартда ёпилган. Расмий версияга кўра, қамоқхона ёпилишига оролда маҳбусларни сақлаш харажатлари жуда юқорилиги сабаб бўлган. Ўша пайтда қамоқхонани таъмирлаш учун  тахминан 3-5 миллион долларга тенг маблағ зарур бўлган. Бундан ташқари, маҳбусларни оролда сақлаш учун зарур маҳсулотларни мунтазам равишда оролга ташиб келтириш қиматга тушган.

Ёпилгандан сўнг, оролдан фойдаланишнинг кўплаб версиялари синаб кўрилган. 1969-71 йилларда эса турли қабилалардан бўлган бир гуруҳ ҳиндулар оролга кўчиб ўтиб яшашди. Орол 1973 йилда сайёҳлар учун очилган ва ҳозирда ҳар йили миллионга яқин ташриф буюрувчиларни қабул қилади.