Санкт-Петербургнинг Красноселский туманида турли, жумладан, жинсий жиноятларда гумон қилинган ўзбекистонлик қўлга олинди.

78.ru нашрининг маҳаллий ҳуқуқ-тартибот идораларидаги манбасига таяниб маълум қилишича, жорий йил 16 январ куни шаҳарнинг Ленинский проспектидаги уйларнинг биридан 30 ёшли Ўзбекистон Республикаси фуқароси қўлга олинган.

Миграция рўйхатидан ўтмаган ушбу шахснинг бир қатор жиноий моддалар бўйича федерал қидирувга берилгани аниқланган. Жумладан, у аёлни турмушга чиқишга мажбурлаш, ўғирлаш, қийноққа солиш, шунингдек порнографик маҳсулотларни ишлаб чиқариш, импорт қилиш, тарқатиш, реклама қилиш ва намойиш қилиш каби жиноятларни содир этганликда гумонланмоқда.

Мазкур шахс, шу билан бирга, ўтган йилнинг декабридан Ўзбекистон ҳуқуқни муҳофаза қилувчи органлар томонидан ҳам қидирувга берилган бўлган.

Айни вақтда унга нисбатан қамоққа олиш эҳтиёт чораси қўлланган. Қўлга олинган шахс илгари ҳам бир неча бор талончилик учун судлангани ҳам аниқланди.