Москвада, собиқ Renault заводи ўрнида Москвич автомобилларини ишлаб чиқариш бошланди. Бу ҳақда Интерфакс ёзмоқда.

Конвейерга биринчи бўлиб қўйилган янги модел «Москвич 3» деб номланди. У 150 от кучига эга бўлиб, 1,5 литр ҳажмли бензинли двигател, икки турдаги –  CVT типидаги (Continuously Variable Transmission, яъни «доимий ўзгарувчан узатма») автомат узатмаси ёки олти поғонали механик узатмалар қутиси билан жиҳозланган.

Автомомбиль Москвада 2022 йил охиригача, бутун Россия бўйлаб эса 2023 йилнинг биринчи чорагида сотувга чиқарилиши айтилмоқда. Йил охиригача заводда «Москвич» электромобилларини ишлаб чиқариш ҳам йўлга қўйилади.

Эслатиб ўтамиз, жорий йил март ойида французларнинг Renault автомобиль маркаси Россияда ишлаб чиқаришни тўхтатган эди. Май ойига келиб эса, рус ҳукумати автомобил ишлаб чиқарувчисининг Россиядаги активлари давлат мулкига айланганини маълум қилган. Яъни «Renault Russia» ЁАЖнинг 100 фоиз акциялари давлат тасарруфига ўтди.

Москванинг «Москвич» автомобилларини ишлаб чиқаришдаги технологик ҳамкори Россиянинг «Камаз» автомобил ишлаб чиқарувчиси ҳисобланади.