Сомали пойтахти Могадишода Hayat меҳмонхонасига Аш-Шабоб жангарилари (Ал-Қоида билан алоқадор террорчи гуруҳ) бостириб кириши оқибатида 21 киши ҳалок бўлди. Бу ҳақда BBC хабар берди.

Полиция маълумот беришича, жангарилар меҳмонхона ёнида портловчи иккита қурилмани ишга туширишган, сўнгра ичкарига бостириб кириб, ўқ ёғдиришган.

Сомали хавфсизлик кучлари жами 106 кишини қутқарган.

«Бегуноҳ одамлар ҳалок бўлгани даҳшатли, хавфсизлик кучлари қутқариш учун бор имкониятини ишга солганди», — деди Могадишо полицияси раҳбарларидан бири Абдуҳасан Муҳаммад Ҳижра журналистларга.

Мамлакат соғлиқни сақлаш вазири Алиҳожи Адан баёнот беришича, қурбонлар сони ошиши мумкин, чунки расмий ҳисоб олинганига қадар қариндошлари жасадларни олиб кетган бўлишлари мумкин. У қўшимча қилишича, жангариларнинг ҳужуми оқибатида 117 киши жароҳатланган, шундан 15 нафари оғир аҳволда.

«Отишма ва портлашлар қўрқинчли эди. Бу мен Могадишода кўрган энг даҳшатли нарсалардан бири», — воқеага муносабат билдирди Сомали разведка бошқармаси директорининг собиқ ўринбосари Абдусалом Гулед.

Меҳмонхонани жангарилардан тозалаш ва одамларни қутқаришга 30 соатдан кўп вақт кетди. Хавфсизлик кучлари тепа қаватларга чиқиш учун бир неча соат уринишди — одамларни гаровга олган жангарилар зиналарни портлатиб юборишганди.