Актёр ва режиссёр Жесси Айзенберг BBC Radioга берган интервюсида Марк Цукербергга ўхшаганларни энди ёқтирмаслигини айтди.

Жесси Айзенберг 2010 йилда Дэвид Финчер суратга олган «Ижтимоий тармоқ» филмида «Фейсбук» асосчиси Марк Цукерберг ролини ижро этган.

«Бу одам қилаётган ишлар яхши эмас, фактларни текширишни (Фейсбукдан) олиб ташлаяпти. Шундоқ ҳам хатар остида турган одамлар учун дунё янада хавфлига айланмоқда», — деди у.

«Бу (бой ва катта таъсирга эга) кишиларнинг миллиардлаб долларлари бор — одамда бундан кўп пул бўлиши мумкин эмас. Улар бу пулларни нима қилишяпти? Нафратни тарғиб қилувчи кишиларга илтифот қилишга сарфлашяпти», — деди актёр миллиардерларнинг Доналд Трамп билан яқинлашаётганига ишора қилиб.

Жесси Айсенберг бу нарсалар уни нафақат ижодкор, балки оддий инсон сифатида ҳам хавотирга солаётганини айтди: «Менинг рафиқам (Анна Страут) ногиронлиги бор одамларга Ню-Йоркда ҳуқуқдан сабоқ беради. Бу йил унинг ўқувчиларига анча оғир бўлади».