Италияда ўтган бир кеча-кундузда 7332 та янги коронавирус инфекцияси билан касалланиш ҳолати қайд этилди. Бу пандемия бошлангандан буён мамлакатдаги энг юқори кўрсаткичдир. Бу ҳақда 14 октябрь куни «TGCal 24» хабар берди.

Шунингдек, охирги 24 соат ичида Италияда коронавирус туфайли 43 та ўлим ҳолати қайд этилди. Шу тариқа COVID-19 қурбонлари сони жами 36 минг кишидан ошди.

Олдинги кунлик антирекорд Италияда 21 март куни қайд этилганди. Ўшанда шифокорлар бир кеча-кундузда 6557 та коронавирус ҳолатини аниқлашган.

Яқинда Италияда янги карантин чоралари кучга киргани тўғрисида хабар берилганди. Тегишли ҳужжатни мамлакат бош вазири Жузеппе Конте ҳамда соғлиқни сақлаш вазири Роберто Сперанца имзоладилар. Ресторан ва барлар ишлаш соати қисқартирилди. Энди улар ярим тунгача ёпилиши шарт.

Шунингдек, профессионал бўлмаган спортчиларнинг жамоавий ва контактли барча мусобақалари тўхтатилди.

Эслатиб ўтамиз, 14 октябрь куни Каталония ҳукумати коронавирус инфекцияси тарқалишини тўхтатиб қолиш мақсадида ҳудуддаги ресторан ва барларни 15 кунга ёпишга қарор қилди. Улар фақат етказиб бериш билан шуғулланиши мумкин.

COVID-19 касаллигини чақирувчи SARS-CoV-2 коронавируси ўтган йили декабрнинг охирида тарқала бошлади. Хитойнинг Ухань шаҳри инфекция ўчоғига айланди. Бир неча ой ичида хасталик дунёнинг 210 дан ортиқ давлатини қамраб олди. 11 март куни ЖССТ коронавирус пандемиясини эълон қилди.